İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 466 Hüküm no: 495 Orijinal metin no: [133a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İbrahim Çelebi b. Halil Efendi’nin Hasan Efendi’den aldığı evi bu defa Yahya Çelebi b. Abdullah’a devrettiği Mahmiye-i İstanbul’da Harâccı Muhyiddin mahalle[si] sâkinlerinden İbrahim Çelebi b. Halil Efendi nâm kimesne meclis-i şer‘-i şerîfde bâ‘is-i hâze’l-kitâb Yahya Çelebi b. Abdullah nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Kîsedâr Ali Efendi mülkü ve bir tarafdan merhûm İbrahim Çelebi veresesi mülkleri ve bir tarafdan tarîk-i hâs ve bir tarafdan tarîk-i âm ile mahdûd fevkānî iki bâb oda ve bir matbah ve bir tahtapûş ve bir kenîfi müştemil olup arsasının sene[de] Hâcegî câmi‘-i şerîfi vakfına üç yüz altmış [akçe] mukāta‘a-i kadîmden olan menzilimi, cümle tevâbi‘ ve levâhık ve kâffe-i hukūk ve merâfıkı ile mezbûr Yahya Çelebi’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile iki yüz esedî guruşa bey‘ ve teslîm ol dahi iştirâ ve tesellüm ve kabz eylediğinden sonra semeni olan meblağ-ı mezbûr iki yüz esedî guruşu yedinden tamâmen ahz u kabz eyledim ba‘de’l-yevm menzil-i mahdûd-ı mezbûr merkūm Yahya Çelebi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ahmed Efendi b. Ramazan el-İmâm, Mehmed Efendi b. Şaban, İbrahim Ağa b. Ali, Ali Beşe b. Nasûh, Mustafa Çelebi b. Hasan, Mehmed Efendi b. Ahmed, Mehmed Ağa b. Mehmed ve gayruhüm.