İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 468 Hüküm no: 497 Orijinal metin no: [134a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden ve akraba oldukları anlaşılan Köse Mustafa b. Mehmed ile Mustafa b. Ali Ağa’nın miras hisselerinin paylaşımı ve el-Hâc Yusuf Beşe’ye teslimi Fi’l-asl vilâyet-i Anadolu’da Şebinkarahisarı sancağında Bayramlı Ordusu kazâsında Karıncalı nâm karye ahâlîsinden olup medîne-i Akkirman’da tavattun ettiğinden sonra vefât eden Köse Mustafa b. Mehmed nâm kimesnenin verâseti, zevce-i metrûkesi Neslihan bt. Koçali nâm hâtuna ve sulbî kebîr oğlu Mehmed ve sulbiye-i sagīre mezbûre Emine ve Mümniye’ye münhasıra olduğu şer‘an sâbit oldukdan sonra sagīrân-ı mezbûrân Emine ve Mümniye’nin tesviye-i umûrlarına [kıbel-i] şer‘îden mansûb vasîleri olup ve mezbûre Neslihan ve Mehmed’in tarafından husûs-ı âti’l-beyâna vekîl olduğu mezbûre Neslihan’ın zâtını ma‘rifet-i şer‘iyye ile ârifân kasaba-i mezbûrda Hân Câmi‘i mahallesi ahâlîsinden Hasan Beşe b. Hamza Reis ve mahmiye-i İstanbul’da Perviz Ağa mahallesi ahâlîsinden el-Hâc Mehmed Reis b. Mustafa nâm kimesneler şehâdetleriyle şer‘an sâbit olan el-Hâc Yusuf Beşe b. Ahmed nâm kimesne meclis-i şer‘-i şerîfde mahrûse-i Galata’da Kulekapısı kurbunda Yazıcı mahallesinde sâkin iken vefât eden Mustafa b. Ali Ağa nâm kimesne sagīrin hayâtında vasîsi olmağla terekesine vâzı‘ü’l-yed olan Dilaver Bey b. Abdullah nâm kimesne ile kezâlik terekesine vâzı‘ü’l-yed olan vâlidesi Emetullah bt. Şaban nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân Mehmed Çavuş b. Ramazan ve Halil b. Hasan nâm kimesneler şehâdetleriyle şer‘an sâbit olan Mehmed Efendi b. Ali nâm kimesne mahzarlarında üzerlerine da‘vâ ve takrîr-i kelâm edip müteveffâ-yı mezbûr sagīr Mustafa’nın babası merkūm Ali Ağa ile müteveffâ-yı mezbûr Köse Mustafa li ebeveyn karındaşı olup babaları ismi Mehmed Çavuş ve dedeleri ismi Halil [134b] Ağa ve anaları ismi Ayşe ve maskat-ı re’sleri karye-i mezbûre olup müteveffâ-yı mezbûr sagīr Mustafa’nın verâseti vâlidesi mezbûre Emetullah[’a] li ebeveyn ammi olmağla usûbet-i nesebiyye cihetinden mezbûr Köse Mustafa’ya ve zikr olunan Yazıcı mahallesi ahâlîsinden Mehmed Çelebi b. Osman ve Süleyman b. İsmail nâm kimesneler şehâdetleri mûcebince li üm er karındaşı Mehmed nâm sagīre münhasıra olup ba‘dehu sagīr-i mezbûr Mehmed dahi fevt olup verâseti vâlidesi mezbûre Emetullah’a ve babası mezbûr Dilaver Bey’e münhasıra olup ba‘dehu mezbûr Köse Mustafa dahi vefât edip verâseti zevcesi mezbûre Neslihan ve sulbî kebîr oğlu mezbûr Mehmed ve sulbiye sagīre kızları mezbûretân Emine ve Mümniye[’ye] münhasıra olup ve mezbûrân Dilaver Bey ve Mehmed Efendi müteveffâ-yı mezbûr sagīr Mustafa’nın terekesine vâzı‘ü’l-yed olmağla hâlâ mezbûr Dilaver Bey’e ve Mehmed Efendi’ye suâl olunup müteveffâ-yı mezbûr sagīr Mustafa’nın terekesinden beş yüz yetmiş altı sehminden müteveffâ-yı mezbûr Köse Mustafa’nın veresesi olan müvekkilân-ı mezbûrân Neslihan ve Mehmed ve sagīretân-ı mezbûretân Emine ve Mümniye[’ye] isâbet eden iki yüz seksen sekiz sehimi bana teslîme tenbîh olunmak matlûbumdur dedikde gıbbe’s-suâl mezbûrân Dilaver Bey ve Mehmed Efendi cevâblarında müteveffâ-yı mezbûr sagīr Mustafa’nın terekesine vâzı‘ü’l-yed olduklarını ikrâr, lâkin müteveffâ-yı mezbûr Köse Mustafa’nın ber vech-i muharrer verâsetini inkâr etmeğin müdde‘î-i mezbûrdan müteveffâ-yı mezbûr Köse Mustafa’nın ber vech-i muharrer verâsetine beyyine taleb olundukda fî asl kazâ-i mezbûra tâbi‘ Akkilise nâm karyeden olup mahmiye-i İstanbul’da Şehzâde câmi‘-i şerîfi kurbunda Camcı mahallesinde sâkin mataracı Mehmed Beşe b. Ali ve yine kazâ-i mezbûra tâbi‘ Bozluca nâm karye ahâlîsinden olup mahrûse-i Galata’da el-Hâc A‘mâ mahallesinde sâkin ve Azebkapısı’nda Mehmed Paşa câmi‘i şerîfinde müezzin olan Mehmed Halîfe b. Ramazan nâm kimesneler li ecli’ş-şehâde meclis-i şer‘a hâzırân olup işhâd olunduklarında fi’l-hakīka müteveffâ-yı mezbûr sagīr Mustafa’nın babası merkūm Ali Ağa ile müteveffâ-yı mezbûr Köse Mustafa li ebeveyn karındaşlar olup babaları ismi Mehmed Çavuş ve dedeleri ismi Halil Ağa ve anaları Ayşe ve maskat-ı re’sleri Karıncalı nâm karyedir, müteveffâ-yı mezbûr sagīr Mustafa’nın verâseti vâlidesi mezbûre Emetullah ve li üm karındaşı sagīr-i mezbûr Mehmed ve li ebeveyn ammi olmağla usûbet-i nesebiyye cihetinden müteveffâ-yı mezbûr Köse Mustafa’ya münhasıra olup ba‘dehu sagīr-i mezbûr Mehmed dahi vefât edip verâseti vâlidesi mezbûre Emetullah ve babası mezbûr Dilaver Bey’e münhasıra olup ba‘dehu mezbûr Köse Mustafa dahi vefât edip verâseti zevcesi mezbûr[e] Neslihan Hâtun’a ve sulbî kebîr oğlu mezbûr Mehmed ve sulbiye sagīre kızları mezbûretân Emine ve Mümniye’ye münhasıradır gayrı vârisi ve terekesine müstahıkk-ı âhar olduğu ma‘lûmum değildir biz bu husûsa bu vech üzre şâhidleriz, şehâdet [135a] dahi ederiz deyû mezbûr edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini suâl için savb-ı şer‘-i şerîfden irsâl olunan Mevlânâ Mustafa Efendi b. Abdülaziz olan zikr olunan Camcı mahallesine varıp ahâlîsinden İmâm Şeyh Yahya Efendi b. Mustafa ve Müezzin Efendi b. İsmail ve kayyım Receb Halîfe b. Yusuf ve Mehmed Efendi b. Osman ve Mustafa Efendi b. Ömer ve Ahmed Beşe b. Kenan ve Attâr Yusuf Beşe b. Abdullah ve Mehmed Çelebi b. Hasan nâm kimesnelerden şâhid-i mezbûr Mehmed Beşe’nin keyfiyyet-i hâlini suâl edip ve sâniyen mârrü’z-zikr el-Hâc A‘mâ mahallesine varıp ahâlîsinden imâm Mustafa Efendi [b.] Mehmed ve Mehmed Çelebi b. Hüseyin el-Müezzin ve Mehmed Efendi b. Abdülbâkī [ve] Attâ[r] Mustafa Beşe b. Mehmed ve Ahmed Beşe b. Abdullah ve Attâr Ahmed b. Bayram ve Attâr el-Hâc Süleyman b. Abdülbâkī ve Hüseyin Beşe b. Osman ve Ebûbekir b. Abdullah nâm kimesnelerden şâhid-i mezbûr Mehmed Halîfe’nin keyfiyyet-i hâlini suâl eyledikde her biri şâhidân-ı mezbûrân Mehmed Beşe ve Mehmed Halîfe için adl ve makbûlü’ş-şehâ[de] olduklarını haber verdiklerinde, Mevlânâ-yı mezbûr mahallinde tahrîr ve ma‘an irsâl olunan Mehmed b. Abdullah ile meclis-i şer‘a gelip alâ vukū‘ihi inhâ ve takrîr etmekle sırren ve alenen ta‘dîl ve tezkiyye olunduklarından sonra şehâdetleri makbûle olmağın mûcebince müteveffâ-yı mezbûr Köse Mustafa’nın ber vech-i tahrîr verâsetine ba‘de’l-hükmi’ş-şer‘î müteveffâ-yı mezbûr sagīr Mustafa’nın terekesinden beş yüz yetmiş altı sehimden müteveffâ-yı mezbûr Köse Mustafa’nın veresesi olan zevcesi müvekkile-i mezbûre Neslihan’ın ve sulbî kebîr oğlu Mehmed’in ve sulbiye sagīr kızları mezbûretân hisse-i şer‘iyyeleri olan iki yüz seksen sekiz sehimi müdde‘î-i mezbûr el-Hâc Yusuf Beşe’ye def‘ ve teslîm mezbûrân Dilaver Bey [ve] Mehmed Efendi’ye tenbîh olunmağın mâ vaka‘a bi’t-taleb ketb olundu. Fî gurreti şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Beşe b. Halil, Mühürdar Mustafa Ağa, Hurdacı Hüseyin Beşe, Habib Beşe b. ( ), Tatar el-Hâc Mehmed, Bayram b. Oruc, Mehmed b. Hızır, Zeyyin Ali Beşe, Ömer b. Osman ve gayruhüm mine’l-hâzırûn.