İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 474 Hüküm no: 503 Orijinal metin no: [136b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Sofular mahallesinden Yani v. Todori’nin Pavlo v. Petro’daki alacağının vasî Aleksi’ye teslimi Mahmiye-i İstanbul’da Sofular mahallesinde bakkal tâ’ifesinden iken bundan akdem hâlik olan Yani v. Todori nâm zimmînin verâseti, zevce-i metrûkesi Panayoriye v. Franço nâm Nasrâniyye ile sulbî sagīr oğlu Yorgaki nâm sagīre münhasıra olduğu şer‘an zâhir ve mütehakkik oldukdan sonra mezbûre Panayoriye’nin li ebeveyn karındaşı ve tarafından husûs-ı âti’l-beyâna vekîli olduğu yedinde olan mazmûnu müsbit hüccet-i şer‘iyye ile şer‘an sâbit olan Aleksi nâm Nasrânî vekâleten ve sagīr-i mezbûrun tesviye-i umûru için kıbel-i şer‘den mansûb vasîsi olmağla vesâyeten meclis-i şer‘de, hâlik-i mezbûrun terekesine bi’l-emâne vâzı‘ü’l-yed olan Pavlo v. Petro nâm zimmî muvâcehesinde üzerine da‘vâ ve takrîr-i kelâm edip mezbûr Pavlo hâlik-i mezbûrun muhallefâtından olup beynimizde ma‘lûm bey‘ eylediği eşyâ semeninden üç bin yüz altmış dört akçeyi mezbûr Pavlo bana def‘ ve teslîm ben dahi vekâleten ve vesâyeten ahz u kabz etmiş idim lâkin hâlik-i mezbûr hayâtında bi tarîki’l-emâne mezbûr Pavlo’ya teslîm eylediği dört bin kırk akçe mezbûr Pavlo yedinde bâkī kalmağla hâlâ suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Pavlo cevâbında fi’l-hakīka kaziyye minvâl-i muharrer üzre olup hâlik-i mezbûr hayâtında nakid dört bin kırk akçesini bi tarîki’l-emâne kendiye teslîm kendi dahi ahz u kabz edip meblağ-ı mezbûr elân yedinde mevcûd olduğu bi’t-tav‘i’s-sâf ikrâr ve i‘tirâf etmeğin mûcebince meblağ-ı mezbûr dört bin kırk akçeyi müdde‘î-i mezbûra def‘ ve teslîme mezbûr Pavlo’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Osman b. Ömer, Mehmed b. Mehmed, el-Hâc Mustafa el-Muhzır ve gayruhüm mine’l-hâzırîn.