İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 475 Hüküm no: 504 Orijinal metin no: [136b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Dal Mehmed Efendi’nin vakfına mütevelli Mustafa Çelebi b. Ömer Ağa’nın vakfa olan borcu için kefiller gösterdiği Mahmiye-i İstanbul’da merhûm Ayşe bt. Dal Mehmed Efendi nâm hâtunun Kefeli mahallesinde vâki‘ vakfına meşrûtiyyet üzre mütevellî olan Mustafa Çelebi b. Ömer Ağa mâl-ı vakf-ı mezbûru ekl ve bel‘ ettiğinden mâ‘adâ umûr-ı vakf-ı mezbûru ikāmete tekâsülü olmağla umûr-ı vakf-ı mezbûru ikāmete taraf-ı şer‘den bir kāimmakām nasb ve ta‘yîn olmak ehem ve elzem ve işbu râfi‘ü’l-vesîka Süleyman Efendi b. Mehmed nâm kimesne müstakīm ve her vechile umûr-ı vakf-ı mezbûru ikāmete kādir olduğu mahalle-i mezbûre ahâlîsinden vakf-ı mezbûra meşrûtiyyet üzre hasbî nâzırlar olup zeyl-i vesîkada muharrerü’l-esâmî olan müslimîn ihbârları ile müte‘ayyin olmağın mezbûr Süleyman Efendi [137a] umûr-ı vakf-ı mezbûru ikāmete taraf-ı şer‘den kāimmakām nasb ve ta‘yîn olundukda merkūm Süleyman Efendi dahi kabûl ve hizmet-i lâzımesini edâya ta‘ahhüd ettiğinden sonra mezbûr Mustafa Çelebi mahzarında takrîr-i kelâm ve ta‘bîr ani’l-merâm edip mezbûr Mustafa Çelebi mâl-ı vakf-ı mezbûrdan doksan bin akçeyi kendi mesârifine sarf ile istihlâk edip zimmetinde vakf-ı mezbûra deyni olmağın hâlâ mezbûr Mustafa Çelebi’ye suâl olunup takrîr[i] tahrîr olunmak matlûbumdur dedikde gıbbe’s-suâl mezbûr Mustafa Çelebi cevâbında kaziyye minvâl-i muharrer üzre olup mâl-ı vakf-ı mezbûrdan doksan bin akçeyi kendi mesârifine sarf ile istihlâk edip zimmetinde vakf-ı mezbûra vâcibü’l-edâ ve lâzımü’l-kazâ deyni olduğu ikrâr ve i‘tirâf ettiğinden sonra meblağ-ı mezbûr doksan bin akçeye mahalle-i mezbûre sâkinlerinden keresteci Avadik v. Bogos ve sulbî oğlu Arutin ve Gönci Çalık [ve] Agop v. Çanom? nâm zimmîlerden her biri tarafından emir ve kabûlü hâvî kefâlet ile kefîl olmağın mâ hüve’l-vâki‘ bi’t-taleb ketb olundu. Fi’l-yevmi’s-sâmin min şehri Rebî‘ilâhir li sene seb‘a ve semânîn ve elf. Şuhûdü’l-hâl: İbrahim Efendi b. Mustafa, Hatîb Mustafa Efendi b. Hasan, Ali Efendi el-İmâm, Hasan b. Hüseyin el-Kayyım el-Hâc Yusuf b. Zeynelabidin ve gayruhüm.