İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 475 Hüküm no: 505 Orijinal metin no: [137a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Abdullah’ın evini Mehmed Tahir Ağa b. Hüseyin’e sattığı Vilâyet-i Rumeli’nde Vize Sarayı kasabası ahâlîsinden Mustafa Bey b. Abdullah nâm kimesne meclis-i şer‘-i şerîf ve mahfil-i dîn-i münîfde, merhûm Ayas Paşa evkāfına hâlâ mütevellî olan mefharü’l-emâcid ve’l-ekârim sâhib-i hâze’l-kitâb Mehmed Tahir Ağa b. Hüseyin tarafından husûs-ı âti’l-beyâna vekîl olduğu İbrahim Beşe b. el-Hâc Mustafa ve Halil Beşe b. Hüseyin nâm kimesneler şehâdetleri ile şer‘an sâbit olan el-Hâc Abdullah b. Osman nâm kimesne mahzarında ikrâr ve takrîr-i kelâm edip yedimde mülküm olup kasaba-i mezbûrede vâki‘ bir tarafdan Dev Ali mülkü ve bir tarafdan Ali Paşa oğlu Mustafa mülkü ve iki tarafdan tarîk-i âm ile mahdûd dâhiliyyesinde fevkānî iki bâb oda ve bir şehnişîn ve matbah ve bir kiler ve altında bir oda ve taşdan mebnî iki oda ve ma[h]zen ve bir cânibinde anbar ve kanavât-ı müsennât ile muhrez su cârî olup çeşme ve iki dönüm zât-ı eşcâr-ı müsmire ve gayr-ı müsmire hadîkayı ve hâriciyyesinde taşdan mebnî iki bâb oda ve hayme ahır ve iki dönüm havluyu müştemil menzilimi cümletü’t-tevâbi‘ ve levâhık ve kâffe-i hukūk ve merâfıkı ile müvekkil-i mûmâ-ileyh Mehmed Tahir Ağa’ya tarafeynden îcâb ve kabûlü hâvî bey‘-i kat‘î ile elli bin fıddî râyic fi’l-vakt akçeye bey‘ ve temlîk, ol dahi iştirâ ve temellük ve kabûl ettiğinden sonra semeni olan meblağ-ı mezbûr elli bin akçeyi bana edâ ve teslîm ben dahi tamâmen ahz u kabz [137b] edip menzil-i mahdûd-ı mezkûru mahallinde zabt ve tasarrufa mûmâ-ileyh Mehmed Tahir Ağa’yı taslît eyledim dedikde vekîl-i merkūm el-Hâc Abdullah mukırr-ı merkūm Mustafa Bey’i cemî‘ kelimâtında [tasdîk] ve tahkīk etmeğin mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ali Bey b. Ahmed Bey, Hüseyin Çelebi b. Üveys, Hasan b. Abdullah, İsmail Efendi b. el-Hâc Mehmed, Cafer Ağa b. Abdullah, Süleyman Ağa b. Üveys, Mehmed Beşe b. Abdullah, Mehmed Ağa b. Abdullah, Mehmed Bey b. Osman, Hüseyin Beşe b. Abdullah, İbrahim Çelebi b. Mehmed ve gayruhüm.