İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 480 Hüküm no: 510 Orijinal metin no: [139a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. At satıcısı Sefer b. Hüseyin’e ortaklarından Mehmed b. Gazanfer’in borçlu olduğu Canbâz tâ’ifesinden bâ‘is-i hâze’l-kitâb Sefer b. Hüseyin meclis-i şer‘-i şerîfde tâ’ife-i mezbûreden Mehmed b. Gazanfer nâm kimesne mahzarında üzerine da‘vâ ve takrîr-i kelâm edip mezbûr Mehmed ile şerîkleri olan hâzırân bi’l-meclis Ramazan ve Hasan ve gāib [an]i’l-meclis Receb ma‘lûm bârgir bahâsından doksan dört esedî guruş hakkım olup meblağ-ı mezbûrun elli guruşunu mezbûrûn yedlerinden ahz u kabz edip bâkī kırk dört guruş için beni mezbûrûn Ramazan ve Hasan ve Receb mezbûr Mehmed üzerine havâle etmekle ben dahi mezbûr Mehmed ile havâle-i mezbûreyi kabûl etmiş idim hâlâ mezbûr Mehmed’e suâl olunup meblağ-ı bâkī-i mezbûr vekâleten ve havâleten mezbûreye binâen bana edâ ve teslîme mezbûr Mehmed’e tenbîh olunmak matlûbumdur, gıbbe’s-suâl mezbûr Mehmed cevâbında kaziyye minvâl-i muharrer üzre olduğu bi tav‘ihî ikrâr ve i‘tirâf etmeğin mûcebince meblağ-ı bâkī-i mezbûru müdde‘î-i mezbûr Sefer’e edâ ve teslîm[e] mezbûr Mehmed’e tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî [139b] aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Hasan Çelebi b. Ahmed, İbrahim Çelebi b. Ahmed, Ebûbekir b. Hüseyin, el-Hâc Kasım b. Receb ve gayruhüm.