İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 480 Hüküm no: 511 Orijinal metin no: [139b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. At satıcısı Ahmed b. Bâli’ye ortaklarından Mehmed b. Gazanfer’in borçlu olduğu Canbâz tâ’ifesinden olup mahmiye-i İstanbul’da Çukur mahalle sâkinlerinden bâ‘is-i hâze’l-kitâb Ahmed b. Bâli nâm kimesne meclis-i şer‘-i şerîfde tâ’ife-i mezbûreden Mehmed b. Gazanfer mahzarında üzerine da‘vâ ve takrîr-i kelâm edip mezbûr mahalle ile şerîkleri olan hâzırân bi’l-meclis Ramazan ve Hasan ve gāib ani’l-meclis Receb nâm kimesneler bundan akdem yedimde iştirâ ve kabz ile mehri beynimizde ma‘lûm bârgir bahâsından hakkım olan yetmiş buçuk guruş için beni mezbûrân ve Hasan ve Receb şerîkleri mezbûr Mehmed üzerine havâle etmekle ben dahi mezbûr Mehmed ile havâle-i mezbûreyi kabûletmiş idim hâlâ mezbûr Mehmed’e suâl olunup asâleten ve havâleten edâ ve teslîme mezbûr Mehmed’e tenbîh olunmak matlûbumdur dedikde gıbbe’s-suâl mezbûr Mehmed kaziyye minvâl-i muharrer üzre olduğunu ikrâr ve i‘tirâf etmeğin mûcebince meblağ-ı mezbûr yetmiş buçuk guruşu müdde‘î-i mezbûra edâ ve teslîme mezbûr Mehmed’e tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Hasan Çelebi b. Ahmed, İbrahim Çelebi b. Ahmed, Ebûbekir b. Hüseyin, Ali b. Ömer ve gayruhüm.