İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 481 Hüküm no: 512 Orijinal metin no: [139b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Takyeci Camii mahallesinden Hatice bt. Mustafa’nın Süleyman b. Abdullah’tan muhâla‘a yoluyla boşandığı Mahmiye-i İstanbul’da hısnı ebvâbından Topkapısı hâricinde Takyeci Câmi‘i mahallesi sâkinelerinden Hatice bt. Mustafa nâm hâtun mahfil-i kazâda, zevc-i dâhili bâ‘is-i hâze’l-kitâb Süleyman b. Abdullah nâm kimesne mahzarında ikrâr ve takrîr-i kelâm edip zevcim mezbûr Süleyman zimmetinde mütekarrir ve ma‘kūdun-aleyh olan iki bin beş yüz akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olmak üzre zevcem mezbûr Süleyman ile muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûreyi kabûl ettikden sonra hukūk-ı zevciyyete ve gayra müte‘allika âmme-i da‘vâdan ben zevcim mezbûr Süleyman’ın zimmetini ibrâ ve iskāt edip ve mezbûr Süleyman dahi mukaddemâ kendi malım ile bana iştirâ ediverdiği beynimizde ma‘lûm bârgir ve talika semenlerine malından on üç guruş zam etmekle meblağ-ı mezbûr on üç esedî guruşdan ve hukūk-ı zevciyyete ve târih-i kitâba gelinceye beynimizde cereyân eden ahz u i‘tâ ve mu‘âmelât-ı şettâya müte‘allika âmme-i de‘âvâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis min şehri Rebî‘ilevvel li sene seb‘a ve semânîn ve elf. Şuhûdü’l-hâl: El-Hâc Yusuf b. Abdullah, İbrahim Çelebi b. Mehmed, Hüseyin b. Mustafa, Mahmud Çelebi b. İsmail, Mahmud b. Mehmed, Muharrem b. Şaban, Hamza Beşe b. Mustafa, es-Seyyid Mustafa Çelebi b. Ali ve gayruhüm.