İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 482 Hüküm no: 513 Orijinal metin no: [140a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Ali’nin es-Seyyid Mehmed b. Ahmed Ağa ile birbirlerinin zimmetlerini ibrâ ettikleri Min hattıhî Mahmiye-i İstanbul’da Koca Mustafa Paşa mahallesi sâkinlerinden fahrü’l-akrân Mustafa Ağa b. Ali nâm kimesne meclis-i şer‘-i hatîr-i lâzımü’t-tevkīrde bâ‘is-i hâze’l-kitâb es-Seyyid Mehmed b. Ahmed Ağa nâm kimesne mahzarında ikrâr ve takrîr-i kelâm edip bundan akdem mezbûr es-Seyyid Mehmed zimmetinde cihet-i karz-ı şer‘îden hakkım olan altmış iki guruş ve Edirne’ye gittiğimizde emri ile bi şarti’r-rücû‘ râh ve sâir mesârifine otuz sekiz guruş ve berât ve ruûs ve tezkire harclarına elli guruş min haysi’l-mecmû‘ zimmetinde hakkım olan yüz elli guruşu mezbûr es-Seyyid Mehmed’den taleb ve da‘vâ eylediğimde, ol dahi ikrâr ettiğinden sonra edâdan imtinâ‘ etmekle beynimizde nizâ‘-ı küllî vukū‘undan sonra muslihûn tavassut edip mezbûr es-Seyyid Mehmed ile beynimizde otuz altı guruş üzerine inşâ-i akd-i sulh eylediklerinde ben dahi sulh-i mezbûru kabûl ve bedel-i sulh olan meblağ-ı mezbûru merkūm es-Seyyid Mehmed’in emri ile Pîrî Paşa vakfından bin seksen altı senesine mahsûb olmak üzre nezâret vazîfesi olup mütevellîsi olan Abdülbâkī nâm kimesneden ahz ve istihlâk eylediğim otuz altı guruşa takās edip mezbûr es-Seyyid Mehmed dahi mukāssa ve kabûl ettiğinden sonra husûs-ı mezbûra müte‘allika da‘vâdan mezbûr es-Seyyid Mehmed’in zimmetini ibrâ ve iskāt edip ve mezbûr es-Seyyid Mehmed dahi bedel-i sulh-i mezkûra ve bundan akdem vefât eden babası merkūm Ahmed Ağa’nın terekesinden ve sâir beynimizde cereyân eden hukūka müte‘allika âmme-i de‘âvâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’t-tâsi‘ min şehri Rebî‘ilâhir li sene seb‘a ve semânîn ve elf. Şuhûdü’l-hâl: es-Seyyid Ahmed Ağa b. Mehmed Ağa, Mehmed Çavuş b. ( ) çavuşân-ı nakībü’l-eşrâf, müteferrika İbrahim Çavuş, es-Seyyid Mehmed Çavuş, Mustafa Çavuş el-Mübâşir, Şeyhzâde Mehmed Çelebi, Fahrü’l-akrân Yıldızzâde Mehmed Çelebi b. Abdullah Çelebi.