İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 483 Hüküm no: 515 Orijinal metin no: [140b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. At satıcısı Markos’a Mehmed b. Gazanfer’in borçlu olduğu Canbâz tâ’ifesinden olup mahmiye-i İstanbul’da Hamamcı Muhyiddin mahallesi sâkinlerinden Markos nâm zimmînin babası ve tarafından husûs-ı âti’l-beyâna vekîl olduğu nehc-i şer‘î üzre sâbit olan bâ‘is-i hâze’l-kitâb Avanos v. Demi nâm zimmî meclis-i şer‘-i şerîfde tâ’ife-i mezbûreden Mehmed b. Gazanfer nâm kimesne mahzarında üzerine da‘vâ ve takrîr-i kelâm edip mezbûr Mehmed ile şerîkleri olan hâzırân bi’l-meclis Ramazan ve Hasan ve gāib ani’l-meclis Receb nâm kimesneler zimmetlerinde bundan akdem müvekkilim mezbûr Markos’un yedinden iştirâ ve kabz ettikleri beynlerinde ma‘lûm bârgir bahâsından yirmi üç guruş hakkı olmağla meblağ-ı mezbûr yirmi üç guruşu bi’l-vekâle mezbûrûndan taleb ve da‘vâ ettiğimde mezbûrûn Ramazan ve Hasan ve Receb dahi şerîkleri mezbûr Mehmed üzerine meblağ-ı mezbûr için beni havâle ettiklerinde ben dahi mezbûr Mehmed ile havâle-i mezbûreyi kabûletmiş idim hâlâ mezbûr Mehmed’e suâl olunup meblağ-ı mezbûru asâleten ve havâle-i mezbûreye binâen bana edâ ve teslîme tenbîh olunmak matlûbumdur dedikde gıbbe’s-suâl mezbûr Mehmed cevâbında kaziyye minvâl-i muharrer üzre olduğu bi tav‘ihî ikrâr ve i‘tirâf etmeğin mûcebince meblağ-ı mezbûr yirmi üç guruşu müdde‘î-i mezbûra edâ ve teslîme mezbûr Mehmed’e tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Hasan Çelebi b. Ahmed, İbrahim Çelebi b. Mehmed, Ebûbekir b. Hüseyin, el-Hâc Kasım b. Receb ve gayruhüm.