İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 485 Hüküm no: 517 Orijinal metin no: [141b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Vefat eden Abdullah Efendi b. Sefer’in Ahmed b. Mehmed’deki alacağının vasî Hasan b. Kasım tarafından tahsil ettiği Vilâyet-i Anadolu’da Bolu sancağında Çarşamba kazâsına tâbi‘ Kılıçlı nâm karye ahâlîsinden iken vefât eden Abdullah Efendi b. Sefer nâm kimesnenin hasren vârisi olan Hasan b. Kasım nâm kimesne meclis-i şer‘de bâ‘is-i hâze’l-kitâb Ahmed b. Mehmed nâm kimesne muvâcehesinde ikrâr ve takrîr-i kelâm edip mezbûr Ahmed mûrisim merkūm Abdullah Efendi fevt oldukda terekesinden bir Mushaf-ı şerîf ve bir re’s doru bârgir ve bir köhne paça kürk ile altmış altı yaldız altınını ahz u kabz ve istihlâk etmekle bundan akdem eşyâ-i mezbûremi ve meblağ-ı mezbûru mezbûr Ahmed’den da‘vâ eylediğimde, ol dahi inkâr etmekle beynimizde münâza‘ât-ı kesîre vâki‘ olmuş idi el-hâletü hâzihî muslihûn tavassut edip mezbûr Ahmed ile beynimizde kırk esedî guruş üzerine inşâ-i akd-i sulh ettiklerinde ben dahi sulh-i mezbûru kabûl ve bedel-i sulh olan meblağ-ı mezbûr kırk guruşun on bir buçuk esedî guruşu mezbûr Ahmed yedinden alıp kabz edip bâkī yirmi buçuk esedî guruşundan ve tereke-i müteveffâ-yı mezbûrun sâir terekesine müte‘allika âmme-i da‘vâdan mezbûr Ahmed’in zimmetini ibrâ ve iskāt eyledim dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Tahrîren fi’l-yevmi’l-âşir min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mustafa Efendi b. Hüseyin, Mehmed Efendi b. Ahmed, Osman Efendi b. Hüseyin, Mustafa Efendi b. Yusuf, Mustafa Çelebi b. Hüseyin.