İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 489 Hüküm no: 523 Orijinal metin no: [143b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mustafa b. Hüseyin’in Kuşadası’ndaki evini 71. yeniçeri odasına bey‘ bi’l-istiğlâl yoluyla sattığı, sonra da evin oda tarafından el-Hâc Halil Çelebi’ye satıldığı Dergâh-ı âlî yeniçeri[leri]nden yetmiş birinci Samsonculara mahsûs oda mühimmâtiyçün mevkūfe nukūda bi’l-fi‘l mütevellî olan el-Hâc Mustafa b. Hüseyin nâm kimesne meclis-i şer‘-i şerîfde el-Hâc Halil Çelebi b. Mehmed mahzarında ikrâr ve takrîr-i kelâm edip bin seksen beş senesi Muharremü’l-harâmı’nın onuncu [günü] medîne-i Kuşadası’na tâbi‘ Cemagil? nâm karye ahâlîsinden Ahmed Bey b. Mustafa Paşa nâm kimesne yedinde mülkü olup medîne-i mezbûrede kal‘ası dâhilinde Câmi‘i şerîf mahallesinde vâki‘ bir tarafdan ba‘zan Ahmed Halîfe ve ba‘zan Hasan Efendi mülkü ve bir tarafdan Menteşoğlu Mehmed Halîfe ba‘zan el-Hâc Hasan mülkleri ve bir tarafdan Musa Efendi mülkü ve bir tarafdan ba‘zan Hatîb Abdullah Efendi veresesi mülkleri ve ba‘zan tarîk-i âm ile mahdûd olup dâhiliyyesinde fevkānî iki bâb oda ve bir sagīr oda ve bir orta sofası ve bir tahtapûş ve tahtânî iki oda ve iki anbar ve bir su kuyusu ve iki kenîf ve mâ-i cârî ve bir hamam ve bir câmekân ve hâriciyyesinde iki bâb oda ve bir orta sofa ve iki bâb sofasını ve bir ahır ve havluyu ve kenîf ve bahçe ve eşcâ[r-ı] müsmire ve gayr-ı müsmireyi ve bir samanhâne ve bir mahzen ve üzerinde bir bâb odayı müştemil menzilini, cemî‘ tevâbi‘ ve levâhık ile bin yüz elli esedî guruşa bana bey‘-i bi’l-vefâ ile bey‘ ve teslîm ben dahi iştirâ ve tesellüm ve semen-i mezbûru yedimde olan mâl-ı vakf-ı mezbûrdan mezbûr Ahmed Bey’e edâ ve teslîm ol dahi ahz u kabz ettiğinden meblağ-ı mezbûru târih-i mezbûrdan iki yüz gün tamâmına değin edâ edip fesh-i akd etmeğe ta‘ahhüd edip müddet-i mezbûre tamâmında deyn-i mezbûru edâ etmiş olmaz ise tarafından menzil-i mahdûd-ı mezbûru âhara bey‘a ve kabz-ı semene ve semeninden meblağ-ı mezbûru bin yüz elli guruşu bana edâya ve fazlasını kendiye îsâle, işbu hâzır bi’l-meclis el-Hâc Mehmed b. Mustafa nâm kimesneyi vekâlet-i devriyye ile vekîl, ol dahi vekâlet-i mezbûreyi kabûl ettiğinden sonra müddet-i mezbûre hulûl edip mezbûr Ahmed Bey meblağ-ı mezbûru edâ edememekle, mezbûr el-Hâc Mehmed vekâlet-i mezbûresi hasebiyle menzil-i mahdûd-ı mezbûru vekîlim olan ani’l-meclis Süleyman Çelebi b. Mustafa nâm [144a] kimesneye bin yüz elli esedî guruşa bey‘ ve teslîm ol dahi vakf-ı mezbûr için iştirâ ve tesellüm ve semeni olan meblağ-ı mezbûr bin yüz elli esedî guruşu mezbûr Ahmed Bey vakf-ı mezbûra deyni olan meblağ-ı mezbûr bin yüz elli guruşa takās ve mezbûr Süleyman Çelebi dahi mukāssa ve kabûl edip menzil-i mahdûd-ı mezbûr, lev iştera’l-mütevellî menzilen bi mâli’l-vakf tesîru vakfen, fehvâsı üzre vakf-ı mezbûrun malından olmuş idi hâlâ menzil-i mahdûd-ı mezbûru merkūm el-Hâc Halil Çelebi’ye cümle tevâbi‘ ve levâhıkı ile tarafından îcâb ve kabûlü hâvî şurût-ı müfsideden ârî bey‘-i kat‘î ile bin yüz seksen yedi buçuk esedî guruşa bey‘ ve temlîk, ol dahi ber vech-i muharrer iştirâ ve kabûl ve temellük eylediğinden sonra semeni olan meblağ-ı mezbûr bin yüz seksen yedi buçuk esedî guruşu merkūm el-Hâc Halil Çelebi yedinden vakf için tamâmen ahz u kabz edip menzil-i mahdûd-ı mezbûru mahallinde zabta merkūm el-Hâc Halil Çelebi’yi taslît eyledim ba‘de’l-yevm menzil-i mahdûd-ı mezbûr merkūm el-Hâc Halil Çelebi’nin mülk-i müşterâsıdır, keyfe mâ yeşâ’ ve yahtâ[r] mutasarrıf olsun dedikde mezbûr el-Hâc Mustafa’nın ikrâr-ı meşrûhunu merkūm el-Hâc Halil Çelebi vicâhen ve şifâhen tahkīk ve tasdîk etmeğin mâ vaka‘a bi’t-taleb ketb olundu. Fi’l-yevmi’s-sâmin min şehri Rebî‘ilâhir li sene seb‘a ve semânîn ve elf. Şuhûdü’l-hâl: El-Hâc Veli b. Ramazan, el-Hâc Musa b. Zorî?, Ebûbekir Beşe b. Osman, Hasan Bey b. Muslu, İbrahim Beşe b. Mehmed, İbrahim Beşe b. Fazlullah, el-Hâc Mustafa b. Ali, el-Hâc Mehmed b. Mustafa, Yusuf b. Abdullah, İbrahim Çelebi b. Mehmed ve gayruhüm.