İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 491 Hüküm no: 524 Orijinal metin no: [144a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Rahime bt. Abdullah’ın eşyalarını Resûl b. Veli’ye hibe ettiği Mahmiye-i İstanbul’da Çakır Ağa mahallesi[nde] sâkine Rahime bt. Abdullah nâm hâtun tarafından husûs-ı âti’l-beyâna vekîl olduğu zâtını ma‘rifet-i şer‘iyye ile ârifân mahalle-i mezbûre sükkânından Ömer Beşe b. Mehmed ve Sefer Beşe b. İslâm nâm kimesneler meclis-i şer‘-i şerîf-i lâzımü’t-teşrîfde, bâ‘is-i hâze’l-kitâb Resûl b. Veli mahzarında bi’l-vekâle ikrâr ve takrîr-i kelâm edip müvekkil-i mezbûre eşyâ-i memlûkesinden iki minder ve bir beledî yorgan ve bir beyaz velense ve bir alaca kilim ve bir tencere ve sagīr ve kebîr iki güğüm ve leğen ma‘a ibrik ve ayaklı iki sandık ve bir kahve ibriği mezbûr Resûl’e şurût-ı müfsidede[n] âriye hibe-i sahîha-i şer‘iyye ile hibe ve teslîm mezbûr Resûl dahi meclis-i ...? [hibede] ittihâb ve kabz ve kabûl eyledi. Min ba‘d eşyâ-i mezbûre mezbûr Resûl’ün emlâk-i mevhûbesidir, keyfe mâ yeşâ’ ve yahtâ[r] mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: (...)oğlu Mehmed, Hüseyin Beşe b. Mehmed, Hasan Beşe b. Abdullah, İbrahim Bey b. er-Râcil, el-Hâc Mustafa b. Tevekkül, İbrahim Çelebi b. Ahmed, Osman b. Ömer ve gayruhüm.