İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 491 Hüküm no: 525 Orijinal metin no: [144b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Tophane’de Bostan mahallesinden Mehmed Reis’in gemisine buğday yükleyerek yabancılara satmadan İstanbul’a getirmek üzere taahhüdü ve kefil tayini Sefîne reislerinden olup mahrûse-i Galata’ya tâbi‘ kasaba-yı Tophâne’de Bostan mahallesinde sâkin bâ‘is-i hâze’l-kitâb Mehmed Reis b. İbrahim meclis-i şer‘-i şerîfde takrîr-i kelâm ve ta‘bîr ani’l-merâm edip Akdeniz yalılarından Selânik ve Koloz ve Kavala ve Siroz ve Anadolu’da vâki‘ Çandarlı iskelelerine varıp buğday iştirâ edip şayka ta‘bîr olunur sefîneme tahmîl ettiğimden sonra harbî kefereye bey‘ etmeyip doğru getirip Mahmiye-i İstanbul’da bey‘ etmek üzre azîmetim olmağla zikr olunan iskelelerde sefînemi bağlayıp ber vech-i muharrer mahmiye-i mezbûreye getirmek için etrâfından buğday iştirâ edip sefîneme tahmîl ettirmeğe mâni‘ olmamak üzre li ecli’l-istîsâk taraf-ı şer‘den kefîlim olsun deyû vesîka tahrîr olunmak matlûbumdur dedikde mahmiye-yi mezbûrede Kâtib Hasan mahallesi ahâlîsinden Ahmed Çelebi b. Abdullah ve el-Hâc Süleyman b. Yusuf nâm kimesneler merkūm Mehmed Reis zikr olunan iskelelerde iştirâ eyledikleri buğday sefînesine tahmîl ettikden sonra harbî kefereye bey‘ etmeyip doğru mahmiye-yi mezbûreye getirip bey‘ etmesine her biri [kefîl] olmağın taraf-ı şer‘den işbu vesîka ketb olundu. Fi’l-yevmi’l-hâmis aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Efendi b. Ahmed, İbrahim b. Ahmed, Veli Beşe el-Muhzır, Mehmed Ağa kethüdâ-yı muhzırân ve gayruhüm mine’l-hâzırîn.