İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 492 Hüküm no: 526 Orijinal metin no: [144b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Receb Ağa b. Mehmed’in yanmış evin arsasını Sadrazam Ahmed Paşa’ya sattığı Hâlâ sa‘âdet ve iclâl ile mesned-nişîn-i sadâret-i uzmâ olup vücûdu sebeb-i ıslâh-ı Benî Âdem bekāsı mûcib-i intizâm-ı ahvâl-i ümem tedbîr-i dil-pezîri bâ‘is-i nizâm-ı umûr-ı şer‘-i millet ve re’y-i rezîni muktezî-i kıyâm-ı mülk ve devlet olan düstûr-ı ma‘delet-şi‘âr müşîr-i ferîdûn-vakār nâzım-ı nizâm-ı âlem-medâr mesâlih-i kâffe-i ümem mümehhid-i kavâ‘idü’ş-şer‘i’l-mübîn müeyyid-i âlemü’d-dîni’l-metîn kāmus-ı bihâr-ı ma‘delet-zâhire nâmûs-ı esrâri’s-saltanati’l-kāhire müdebbir-i umûrü’d-devleti fi’l-âfâk câlisi serîri’l-vezâreti bi’l-istihkāk el-müstağnî zâtihi’l-âlî ani’l-atnâb ve’l-elkāb devletlü ve sa‘âdetlü Ahmed Paşa -yesserallâhu fi’d-dâreyn mâ yürîdü ve mâ yeşâ’-hazretleri taraf-ı bâhirü’ş-şereflerinden husûs-ı âti’z-zikre vekîl-i sâbitü’l-vekâleleri olan umdetü’l-emâcid ve’l-ekârim câmi‘ü’l-mehâmid ve’l-mekârim Siyavuş Ağa b. Mehmed hilâl-i sütûrda mastûr olan husûsu mahallinde ketb ve terkīmi iltimâs etmeğin savb-ı şer‘-i enverden irsâl olunan İmâmzâde Mehmed Efendi b. Mustafa, ağa-yı müşârün-ileyhin Dârü’l-hilâfeti’l-aliyye Kostantıniyye el-mahmiye’de Güngörmez mahallesinde vâki‘ menziline varıp zeyl-i kitâbda muharrerü’l-esâmî olan müslimîn huzûrlarında akd-i meclis-i şer‘-i mübîn ettikde, mahmiye-i mezkûrede Hobyar mahallesinde sâkin el-Hâc Receb Ağa b. Mehmed meclis-i ma‘kūd-ı mezbûrda, vekîl-i müşârün-ileyh Siyavuş Ağa mahzarında bi’t-tav‘i’s-sâf ikrâr-ı sahîh-i şer‘î ve i‘tirâf-ı sarîh-i mer‘î kılıp, akd-i âtî sudûruna değin silk-i mülk-i sahîhimde münselik olup mahmiye-i mezbûrede merhûme ve mağfûrun-lehâ Vâlide Sultan -tâbe serâhâ-hazretleri binâ buyurdukları hamam kurbunda Fenârîzâde Ahmed Paşa mahallesinde vâki‘ bir tarafdan Harameyn-i şerîfeyn vakfı ve bir tarafdan tarîk-i âm ve bir tarafdan merhûme Kaya Sultan Sarayı demekle ma‘rûf saray ve bir tarafdan kapıcıbaşı Mehmed Ağa [145a] vakfı olan müte’ehhilîn odaları ile mahdûd ve mümtâz tûlen ve arzen bi hesâb-ı terbî‘î bin doksan iki zirâ‘ muhterik mülk menzil arsamı enkāz ve cemî‘ tevâbi‘ ve levâhıkıyla mûmâ-ileyh Siyavuş Ağa’ya iki bin sekiz yüz esedî guruşa tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile bey‘ ve temlîk ve teslîm ol dahi müvekkil-i müşârün-ileyh -esbağallâhu te‘âlâ ni‘amehû aleyh-hazretleri için bi’l-vekâle iştirâ ve kabûl ve temellük ve tesellüm ettiğinden sonra semeni olan meblağ-ı mezbûr iki bin sekiz yüz esedî guruşu mûmâ-ileyh Siyavuş Ağa yedinden bi’t-tamâm ve’l-kemâl ahz u kabz eyledim. Fîmâ ba‘d mebî‘-i mahdûd-ı mezkûr müvekkil-i müşârün-ileyh hazretlerinin dâhil-i havza-i tasarrufları olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teberi’l-vicâhî vâki‘ hâli mezbûr Mehmed Efendi mahallinde ketb ve terkīm edip ba‘dehu cânib-i şer‘den ma‘an irsâl olunan Bayram b. Abdullah, el-Hâc Yusuf b. Abdülmennân ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Umdetü’l-ekârim Yusuf Ağa kethüdâ-yı Saray, fahrü’l-eşbâh Su nâzırı Mehmed Ağa, Abdurrahman Efendi el-Üsküdârî, Mehmed Efendi b. Mustafa, İbrahim Çelebi b. Abdullah, Hasan Efendi b. Abdullah, Abdullah Çelebi b. Hüseyin, Ali Çelebi b. Mehmed, Mehmed b. Abdurrahman, Ömer Ağa b. Mehmed, Beşir b. Şaban, Ahmed Efendi b. Mehmed, Hüseyin Efendi b. Osman.