İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 493 Hüküm no: 527 Orijinal metin no: [145a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Mehmed’in Mustafa Efendi b. Ahmed’deki alacağını tahsil ettiği Husûs-ı âti’l-beyânı mahallinde tahrîr için gıbbe’l-iltimâs irsâl olunan küttâb-ı mahkemeden Mevlânâ Mehmed Efendi b. Mahmud, mahmiye-i Mimar Sinan mahallesinde sâkin umdetü’l-müderrisînü’l-kirâm Siyahî Mustafa Efendi b. Şaban hazretlerinin sa‘âdet-hânesine varıp zeyl-i kitâbda mastûrü’l-esâmî olan müslimîn huzûrunda akd-i meclis-i şer‘-i mübîn eyledikde mahmiye-i mezbûrede Nişâncı Paşa-yı Cedîd mahallesi sâkinlerinden Mustafa Efendi b. Mehmed nâm kimesne meclis-i ma‘kūd-ı mezbûrda Mustafa Çelebi b. Ahmed nâm kimesne mahzarında ikrâr ve takrîr-i kelâm edip bundan akdem mezbûr Mustafa Çelebi’ye beynimizde ma‘lûm bir husûs için def‘ ve teslîm ol dahi ahz u kabz eylediği yüz elli kıt‘a esedî guruşa müte‘allika da‘vâdan mezbûr Mustafa Çelebi’nin zimmetini ibrâ-i âmm-ı [145b] kātı‘ü’n-nizâ‘ ile ibrâ ve iskāt eyledim ba‘de’l-yevm meblağ-ı mezbûr yüz elli kıt‘a esedî guruşa müte‘allika benden bi’z-zât [ve]ya vekîlimizden bi’l-vekâle da‘vâ zuhûr ederse lede’l-hükkâmi’l-kirâm makbûle ve mesmû‘a olmasın dedikde gıbbe’t-tasdîki’ş-şer‘î husûs-ı mezbûru Mevlânâ-yı mezbûr mahallinde tahrîr, ba‘dehu [ma‘an] irsâl olunan Eyyûb b. Ali ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâlis aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mustafa Efendi b. Ali, Hasan Efendi b. Mehmed el-İmâm, hâfız Mehmed Efendi b. Hüseyin, Abdülhalim b. Mehmed, Osman Efendi b. Hüseyin.