İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 494 Hüküm no: 528 Orijinal metin no: [145b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Gülistan bt. Abdullah’ın el-Hâc Murad b. İbrahim’in câriyesi olduğunu itirafı İşbu orta boylu açık kaşlı sarı ala gözlü Macariyyetü’l-asl Gülistan bt. Abdullah meclis-i şer‘-i şerîfde el-Hâc Murad b. İbrahim nâm kimesne mahzarında ikrâr ve takrîr-i kelâm edip medîne-i Belgrad’da Eski Atpazarı sâkinelerinden olan işbu hâzır bi’l-meclis Fâtıma bt. Süleyman nâm hâtunun ben câriye-i memlûkesi olduğum hâlde yüz guruş semen-i makbûza merkūm el-Hâc Murad beni bundan akdem bey‘ ve teslîm ol dahi iştirâ ve tesellüm eylediğinden sonra bir esircinin ta‘allümü ile ben medîne-i mezbûre kurbunda bir karye sâkinelerinden hürretü’l-asl deyû da‘vâetmiş idim hâlâ da‘vâ-yı mezbûremde mubtılayım, mezbûr el-Hâc Murad’ın câriye-i memlûkesiyim, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: İbrahim Çelebi b. Mehmed, Osman b. Ömer, Osman b. Mustafa, Musa Halîfe b. Receb ve el-Hâc Kasım b. Receb, Ebûbekir b. Hüseyin.