İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 494 Hüküm no: 529 Orijinal metin no: [145b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. el-Hâc Mustafa b. Abdullah’ın vârisi olan oğlu Abdullah’ın Tatavla’daki miras hisselerini yeniçeri ağası Mustafa Ağa’ya sattığı Mahrûse-i Galata’da Okçu Musa mahallesinde sâkin iken bundan akdem vefât eden el-Hâc Mustafa b. Abdullah’ın verâseti, sulbî sagīr oğulları Abdullah ve Mustafa ve sulbiye kebîre kızı Rahime’ye münhasır olduğu şer‘an sâbit oldukdan sonra mezbûr Abdullah meclis-i şer‘-i şerîf ve mahfil-i dîn-i münîfde, hâlâ Dergâh-ı âlî -dâme mahfûfen bi’l-me‘âlî-yeniçerileri ağası olan umdetü’l-emâcid ve’l-ekârim mecma‘ü’l-mehâsin ve’l-mekârim sâhibü’l-mefâhirü’l-aliyye hâvi’l-me’âsiri’s-seniyye zü’l-kadri’r-refî‘ ve’l-câhi’l-menî‘ sa‘âdetlü Mustafa Ağa hazretleri taraf-ı bâhirü’ş-şereflerinde husûs-ı âti’l-beyâna vekîl olduğu mumcu Osman Beşe b. Mehmed ve Mehmed Beşe b. Ahmed nâm kimesneler şehâdetleriyle vekâleti sâbit olan Arabzâde Mehmed Efendi b. Ömer nâm kimesne mahzarında ikrâr ve takrîr-i kelâm edip arsası [146a] zikri âtî arâzi ile senede iki bin beş yüz akçe mukāta‘a ile merhûm ve mağfûrun-leh Sultan Bayezid Hân hazretleri evkāfından babam müteveffâ-yı mezbûr el-Hâc Mustafa’nın ile’l-vefât taht-ı tasarrufunda ve üzerinde olan ebniyesi mülkü olup mahrûse-i mezbûre müzâfâtından kasaba-i Kasımpaşa’ya tâbi‘ Tatavla nâm karyede vâki‘ lede’l-ahâlî ve’l-cîrân ma‘lûmü’l-hudûd fevkānî dört bâb oda ve tahtânî üç ahır ve bir kebîr samanhâne ve bir fırın ve bir sagīr oda ve on dönüm zât-ı eşcâr ve kürûm bağı ve iki gedikli karlığı müştemil çiftlik ta‘bîr olunur menzilin ebniyesinden beş sehimden hisse-i şer‘iyyem olan iki sehmi, bi’l-cümle tevâbi‘ ve’l-levâhık vekîl-i merkūm Mehmed Efendi’ye tarafeynden îcâb ve kabûlü hâvî bey‘-i kat‘î ile dört yüz elli guruşa bey‘ ve teslîm ve arsasından kezâlik beş sehimden hissem bir sehim ile çiftlik-i mezbûra teba‘iyyet ile zirâ‘at olunup etrâfında olan lede’l-ahâlî ve’l-cîrân ma‘lûmü’l-hudûd ve’l-kıt‘a tarlalardan ve Kâğıdhane üstünde ve Beyoğlu kurbunda ve Ayazma kurbunda olan ma‘lûmü’l-hudûd tarlalardan ve Kocaderesi nâm mevki‘de bâkī karlıkdan ikişer sehimden evkāf-ı mezbûre mütevellîsinden tapulamak ile taht-ı tasarrufumda olan birer sehmi yüz guruş bedel mukābelesinde evkāf-ı mezbûre mütevellîsi izn[i] ile ferâğ ve tefvîz ve vekîl-i merkūm Mehmed Efendi dahi müvekkil-i müşârün-ileyh Mustafa Ağa hazretleri [i]çin iştirâ ve tesellüm ve tefvîz ve kabûl ettiğinden sonra semen-i mezbûr dört yüz elli guruş ve bedel-i mezkûr yüz guruş cem‘an beş yüz elli guruş bana edâ ve teslîm ben dahi yedinden ahz u kabz eyledim ba‘de’l-yevm mârrü’z-zikr çiftlik ebniyesinden beş sehimden iki sehmi müvekkil-i mûmâ-ileyh Mustafa Ağa hazretlerinin mülk-i müşterâsıdır ve arsası zikr olan tarlaları ve karlığın ikişer sehimden birer sehmi hakk-ı müfevvezidir dedikde gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’l-hâmis aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ruznâmçeci Mehmed Efendi b. Davud, Mustafa Çelebi kâtib-i Vakf-ı Ali Paşa, Mehmed Efendi kâtib-i kethüdâ yeri, Hasan Çavuş b. Mustafa, Mehmed Çelebi b. Mustafa, Ali Beşe b. Mehmed, Mustafa câbi-i Kasımpaşa, Hamamcızâde Ahmed Çelebi, Hacı Mehmed b. el-Hâc Abdülganî ve gayruhüm mine’l-hâzırîn.