İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 495 Hüküm no: 530 Orijinal metin no: [146b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İlya v. Mincar’ın vârisleri olan kardeşleri Mandeli ve Ezmerağda’nın kendilerine miras kalan dükkânı Yorgi v. Eksaboni’ye sattıkları Mahmiye-i İstanbul’da Samatya kapısı dâhilinde Hacı Hüseyin mahallesi sâkinlerinden iken bundan akdem hâlik olan İlya v. Mincar zimmînin verâseti li ebeveyn er karındaşı Mandeli ve li ebeveyn kız karındaşı Ezmerağda’ya münhasıra olduğu şer‘an sâbit oldukdan sonra mezbûr Mandeli kendi tarafından asâleten ve mezbûre Ezmerağda tarafından husûs-ı âti’l-beyâna vekîl olduğu nehc-i şer‘î üzre sâbit olmağla vekâleten meclis-i şer‘-i şerîfde bâ‘is-i hâze’l-kitâb Yorgi v. Eksaboni nâm zimmî muvâcehesinde üzerine da‘vâ ve takrîr-i kelâm edip hâlik-i mezbûrun terekesinden olup mahmiye-i mezbûrede vâki‘ Süleyman Ağa mahallesinde vâki‘ bir tarafdan Kürkçübaşı vakfı ve bir tarafdan Hasan Paşa zevcesi ( ) hâtun mülkü ve bir tarafdan hâlik-i mezbûrun âhar mülkü ve bir tarafdan Mustafa Çelebi mülkü ile mahdûd dükkânı üzerinde olan bir bâb odayı bin seksen senesi Rebî‘ulevveli’nin onuncu günü beş yüz guruşa bey‘ ve teslîm ol dahi ahz u kabz ettiğinden sonra târih-i kitâbdan bir sene mukaddem zikr olunan dükkânı beş yüz guruş ancak değer deyû beni ve müvekkilem mezbûre Ezmerağda’yı tağrîr etmekle beni dahi bey‘ine mağrûr olup beş yüz guruşa dükkân-ı mezbûru sana bey‘ ve teslîm etmiş idik deyû dükkân-ı mezkûru mezbûr Yorgi’den asâleten ve vekâleten taleb ve da‘vâ ettiğimde beynimizde nizâ‘-ı küllî vukū‘undan sonra muslihûn tavassut edip mezbûr Yorgi ile beynimizde yüz yirmi guruş üzerine inşâ-i akd-i sulh ettiklerinde ben dahi asâleten ve vekâleten sulh-ı mezbûru kabûl ve bedel-i sulh olan meblağ-ı mezbûr yüz yirmi guruşu mezbûr Yorgi yedinden ahz u kabzetmiş idim hâlâ zikr olan dükkân ve üzerinde olan dükkân müte‘allika âmme de‘âvâ[da]n mezbûr Yorgi’nin zimmetini asâleten ve vekâleten ibrâ-i âm ile ibrâ ve iskāt edip ve mezbûr Yorgi dahi bedel-i sulh-ı mezbûra müte‘allika da‘vâdan benim zimmetimi ve mezbûre Ezmerağda’nın zimmetini ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mustafa Efendi b. Davud el-İmâm, Halil Çelebi b. Musa el-Müezzin, Mahmud Çelebi b. Abdullah, Odabaşı Ahmed Beşe b. Mehmed, Hasan Beşe b. Osman, Mehmed Çelebi b. Ali, Yusuf Beşe b. Sâlih, Zülfikār Bey b. Abdülgaffâr, İstefani v. Tamatoy, Manol v. Papa Lefteri, Yani v. Ergiri, Panol v. Andriye, Nikola v. Yani, Andriye v. Yorgi, Yorgi v. Yani, Yakomi v. Yani, Andon v. Marko, Yani v. Andon.