İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 496 Hüküm no: 531 Orijinal metin no: [146b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeriler beytülmâl emini Mustafa Ağa’nın Mehmed b. İlyas’ın gemi hisselerini iadesi Vilâyet-i Anadolu’da Gemlik kazâsına tâbi‘ Karacalı nâm karye sükkânından bâ‘is-i hâze’l-kitâb el-Hâc Mehmed b. İlyas nâm kimesne meclis-i şer‘-i şerîfde Dergâh-ı âlî yeniçerileri beytülmâl emîni olmağla mahmiye-i İstanbul’da el-Hâc Ahmed mahallesinde sâkin iken bundan akdem bilâ?-vâris vefât edip terekesi beytülmâla âid olan Mustafa Beşe nâm kimesnenin terekesine vâzı‘ü’l-yed olan fahrü’l-akrân Mustafa Ağa mahzarında üzerine da‘vâ ve takrîr-i kelâm edip müteveffâ-yı mezbûrun hâlâ Davudpaşa iskelesinde merbûta olan çenber ta‘bîr olunur sefînesinin on sehimden iki sehmi müteveffâ-yı mezbûr ve sekiz sehmi benim mülküm iken mezbûr Mustafa Ağa sefîne-i mezbûrenin cümlesi müteveffâ-yı mezbûr Mustafa Beşe’nin terekesinden olmak üzre bi gayri hakkın vaz‘-ı [147a] yed eder suâl olunup sefîne-i mezbûrenin on sehminin sekiz sehminden kasr-ı yed edip bana teslîme emîn-i mezbûra tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda mahmiye-i mezbûrede Sultan Bayezid-i Cedîd mahallesi sâkinlerinden el-Hâc Ali b. Ahmed ve Kasab İlyas mahallesi sâkinlerinden Mehmed b. Osman ve karye-i mezbûre sükkânından Sâlih Çelebi b. Mahmud [ve] Narlı nâm karyeden el-Hâc Mehmed b. Osman nâm kimesneler li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka hâlâ Davudpaşa iskelesinde merbût olan çenber ta‘bîr olunur sefînenin on sehminden iki sehmi müteveffâ-yı mezbûr Mustafa Beşe’nin mülkü olup ve sekiz sehmi müdde‘î-i mezbûr el-Hâc Mehmed’in mülküdür biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri makbûle olup müdde‘î tahlîf-i şer‘î ile tahlîf olundukdan sonra mûcebince sefîne-i mezkûrenin on sehminden sekiz sehmini müdde‘î-i mezbûra teslîme emîn-i merkūm Mustafa Ağa’ya tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Osman Çelebi b. Ömer, Ebûbekir b. Hüseyin, Mehmed b. Mehmed, Muharrem b. Şaban ve gayruhüm.