İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 497 Hüküm no: 532 Orijinal metin no: [147a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bursa eski subaşısı Süleyman Bey b. Ahmed’in Bursa eski kadısı Kevâkibîzâde Mehmed Efendi’de alacağının olmadığı Mahrûse-i Bursa’da sâbıkan subaşı olan Süleyman Bey b. Ahmed nâm kimesne meclis-i şer‘-i şerîfde mahmiye-i İstanbul’da Beyceğiz mahallesinde sâkin olup sâbıkan mahrûse-i mezbûra kadı olan a‘lemü’l-ulemâ’i’l-izâm efdalü’l-fuzalâ’i’l-fihâm bâ‘is-i hâze’l-kitâb Kevâkibîzâde eş-Şeyh Mehmed Efendi tarafından husûs-ı âti’l-beyâna vekîl olduğu Süleyman Çavuş b. Mahmud ve Mehmed Efendi b. Ahmed nâm kimesneler şehâdetleri ile şer‘an sâbit olan Osman Efendi b. Mehmed mahzarında üzerine da‘vâ ve takrîr-i kelâm edip mûmâ-ileyh Şeyh Mehmed Efendi mahrûse-i mezbûra kadı iken müttehem olmağla haps eylediği? ricâl ve nisâdan beş nefer kimesneler cerîmeleri için kendi malımdan bi gayri hakkın yüz otuz beş guruş mûmâ-ileyh Şeyh Mehmed Efendi’ye kethüdâsı İbrahim Çelebi yediyle irsâl ve teslîm ol dahi ahz u kabzetmiş idi hâlâ vekîl-i merkūm Osman Efendi’ye suâl olunup meblağ-ı mezbûru müvekkil-i mûmâ-ileyh bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin müvekkil-i mûmâ-ileyh tahlîf için savb-ı şer‘-i şerîfden irsâl olunan Mevlânâ Abdurrahman Efendi müvekkil-i mûmâ-ileyhin mahalle-i mezbûrede sâkin oldukları menziline varıp zeyl-i vesîkada muharrerü’l-esâmî olan müslimîn huzûrunda akd-i meclis-i şer‘-i mübîn edip müvekkil-i mûmâ-ileyhe meblağ-ı mezbûr yüz otuz beş guruşu müdde‘î-i mezbûr yedinden ber vech-i muharrer ahz u kabz etmediğine müdde‘î-i mezbûr muvâcehesinde yemîn teklîf eyledikde ol dahi alâ vefki’l-mes’ûl yemîn billâhi’l-aliyyi’l-a‘lâ ettiğini Mevlânâ-yı mezbûr mahallinde tahrîr, ba‘dehu ma‘an irsâl olunan Mehmed b. Ahmed ile meclis-i şer‘a gelip alâ vukū‘ihi inhâ ve takrîr ettiğinden sonra müdde‘î-i mezbûr bilâ-beyyine ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sâlis aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Şeyh Ahmed Dede, Dilaver b. Abdullah, Mustafa b. Cafer, Mustafa Çelebi b. ( ), Hasan b. Abdullah, Mustafa Çelebi b. ( ).