İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 498 Hüküm no: 533 Orijinal metin no: [147b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Çelebi b. Ali ve kardeşi Safiye Hâtun’un ev ve dükkânlarını yeniçeri para vakfına bey‘ bi’l-istiğlâl yoluyla sattıkları Mahmiye-i İstanbul’da Ahîzâde mahallesi sükkânından Mustafa Çelebi b. Ali nâm kimesne kendi tarafından asâleten ve li ebeveyn kız karındaşı Safiye Hâtun tarafından husûs-ı âti’l-beyâna vekîl olup vekâleti zât-ı mezbûreyi ma‘rifet-i şer‘iyye ile ârifûn olan İmâm Süleyman Efendi b. Mehmed ve Hüseyin Efendi b. Mustafa ve Mehmed Çelebi b. İbrahim ve Mehmed Çelebi [b.] İbrahim ve Mehmed Çelebi b. Mustafa nâm kimesneler şehâdetleri ile şer‘an vekâleti sâbite olmağla vekâleten meclis-i şer‘de, Dergâh-ı âlî yeniçerilerinin otuz sekizinci cemâ‘atine mahsûs oda neferâtının düzen? akçelerine mevkūfe nukūdun bi’l-fi‘l mütevellîsi olan Mehmed Çelebi b. Ahmed nâm kimesne mahzarında asâleten ve vekâleten ikrâr ve takrîr-i kelâm edip mahalle-i mezbûrede vâki‘ bir tarafı merhûm Kazasker Abdurrahman Efendi vakfı menzili ve bir tarafı merhûm Mimar Sinan vakfı odalara ve bir tarafı Kara Emin vakfı odalara ve bir [tara]fı tarîk-i âma müntehî hâriciyye ve dâhiliyyede büyût-ı müte‘addideyi müştemil mülk-i mevrûsumuz olan menzil ile üç aded dükkânı, bi cümleti’t-tevâbi‘ ve’l-levâhık mütevellî-i mezbûr Mehmed Çelebi’ye bin seksen altı senesi Şevvâlü’l-mükerrem gurresinde üç yüz kırk beş kıt‘a esedî guruşa bi tarîki’l-istiğlâl bey‘ ve teslîm ol dahi yedinde olan mâl-ı vakf-ı mezbûr ile iştirâ ve tesellüm eyledikden sonra semen-i mezbûr üç yüz kırk beş esedî guruşu asâleten ve vekâletim hasebiyle mâl-ı vakf-ı mezbûrdan mütevellî-i mezbûr yedinden ahz u kabz eylediğimden sonra mütevellî-i mezbûr menzil-i mahdûd-ı mezkûr ile üç aded dükkânı ba‘de’t-tahliyyeti’ş-şer‘iyye ve’t-tekābuzi’l-mer‘î târih-i mezbûrdan bir sene tamâmına değin elli bir esedî guruş ve üç rub‘ guruşa bize îcâr ve teslîm biz dahi vech-i muharrer üzre istîcâr ve kabûl eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’r-râbi‘ aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: İbrahim Çelebi b. Ahmed, Mustafa Çelebi b. Şaban, Halil Çelebi b. ( ), Ebûbekir b. Hüseyin, Ahmed Odabaşı b. ( ), Davud Çavuş b. Şaban.