İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 499 Hüküm no: 534 Orijinal metin no: [147b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Maraş Valisi Ali Paşa b. Abdüllatif’in han, dükkân, çiftlik, ev, tarla ve bahçelerini rehin bırakarak Mustafa Ağa b. Abdülahad’dan borç aldığı Dârü’l-hilâfeti’l-aliyye Kostantıniyye el-mahmiye’de Vezir hanı kurbunda Hüseyin Paşa Sarayı’nda sâkin olup hâlâ Maraş vâlisi olan emîrü’l-ümerâ’i’l-kirâm kebîrü’l-küberâ’i’l-fihâm Ali Paşa b. Abdüllatîf hazretleri taraf-ı bâhir-i şereflerinden husûs-ı âti’l-beyâna vekîl olduğu müşârün-ileyh hazretlerinin kapıcılar kethüdâsı olan fahrü’l-akrân el-Hâc Mehmed Ağa b. Receb ve Ahmed Bey b. Abdullah nâm kimesneler şehâdetleri ile şer‘an sâbit olan ve kethüdâları zahrü’l-eşbâh el-Hâc Mehmed Ağa b. Receb nâm kimesne meclis-i şer‘-i şerîf ve mahfil-i dîn-i münîfde, mefharü’l-emâsil ve’l-ekfâ sâhib-i hâze’l-kitâb Mustafa Ağa b. Abdülahad mahzarında ikrâr ve takrîr-i kelâm edip müvekkil-i müşârün-ileyh Ali Paşa hazretleri mûmâ-ileyh Mustafa Ağa yedinden istikrâz ve kabz eylediği on bin kıt‘a esedî guruş ve semeni târih-i kitâbdan bir [148a] sene tamâmına değin iştirâ ve kabz eyledi[ği] beynlerinde ma‘lûm cevâhir semeninden iki bin kıt‘a esedî guruş min haysi’l-mecmû‘ müvekkil-i müşârün-ileyh hazretleri zimmetinde mûmâ-ileyh Mustafa Ağa’ya vâcibü’l-edâ ve lâzımü’l-kazâ deyni olan on iki bin kıt‘a esedî guruş mukābelesinde yedinde mülk olup kasaba-i mezbûre iskelesinde vâki‘ Hân-ı Cedîd demekle ma‘rûf olup iki tarafdan mekābir-i müslimîn ve bir tarafdan tarîk-i âm ve bir tarafdan âhar mülkü olan dekâkîn ile mahdûd dâhiliyye fevkānî ve tahtânî yetmiş bâb oda ve yine hân-ı mezkûra muttasıl dokuz bâb mahzen ve ber vech-i tahmîn iki yüz at alır ahır ve ahıra muttasıl bir samanhâne ve hâriciyye yine hân-ı mezkûra muttasıl on kıt‘a dekâkîn ve dekâkîn-i mezkûrenin hizâsında yalı cânibinde dokuz kıt‘a dekâkîn ve iki yüz zirâ‘ arsasını ve Havâss-ı Aliyye kazâsı müzâfâtından Küçükçekmece nâhiyesinde Fîrûz nâ[m] karyede vâki‘ bir tarafdan sâhil-i bahr ve iki tarafdan tarîk-i âm ve bir tarafdan taht-ı tasarrufunda olan tarlalar ile mahdûd dâhiliyyesinde fevkānî beş bâb oda ve bir orta sofası ve iki yan sofası ve bir kenîf ve tahtânî üç bâb oda ve bir matbah ve bir fırın ve üç anbar ve hâriciyyesinde iki bâb tahtânî oda ve bir çıkıcı? odası ve bir kebîr ahır ve bir öküz ahırı ve bir samanhâne ve bir sığır ahırı ve dâhiliyye ve hâriciyyesinde kanavât-ı müsennât ile muhrez mâ’-i cârî ve dâhiliyye ve hâriciyye beyninde vâki‘ dört dönüm bağ ve bahçeyi ve harman yerini ve harman yerine muttasıl on dönüm bağı ve tarîk-i âm tarafında bir kıt‘a sebzevât bahçesi ve bahçe-i mezkûre kurbunda bir bostan yeri ve bir yel değirmenini müştemil çiftlik ta‘bîr olunur mülk menzilini, cümle tevâbi‘ ve levâhıklar ile mûmâ-ileyh Mustafa Ağa’ya rehin vaz‘ ve teslîm edip mûmâ-ileyh Mustafa Ağa dahi irtihân ve tesellüm ettiğinden sonra müvekkil-i müşârün-ileyh hazretleri müddet-i merkūme tamâmında edâ-i deyn ile fesh-i akde ta‘ahhüd eyledi dedikde gıbbe’t-tasdîki’ş-şifâhî ve’t-tahlîfi’l-vicâhî, mâ vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mefharü’l-emâsil ve’l-a‘yân el-Hâc Yusuf Ağa-yı sadr-ı âlî, Zahrü’l-emâsil ve’l-akrân el-Hâc Mehmed Ağa b. Mahmud, Zahrü’l-akrân Ali Ağa b. Mehmed sâkin-i mahalle-i Nişâncı der Eyyûb, Yusuf Ağa b. ( ), Abdülkādir Efendi b. ( ), İbrahim Ağa b. ( ), Hasan Ağa, Mehmed Üsküdârî ve gayruhüm mine’l-hâzırîn.