İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 501 Hüküm no: 536 Orijinal metin no: [148b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Yeniçeri Ahmed Beşe b. Abdi’nin koyunlarını Muslu Beşe b. Kadri’ye sattığı Vilâyet-i Anadolu’da medîne-i Edincik kazâsına tâbi‘ Dutlu nâm karye ahâlîsinden olup Dergâh-ı âlî yeniçerilerinin altmış üçüncü solaklara mahsûs oda yoldaşlarından Ahmed Beşe b. Abdi nâm kimesne meclis-i şer‘-i şerîfde bâ‘is-i hâze’l-vesîka Muslu Beşe b. Kadri nâm kimesne mahzarında ikrâr ve takrîr-i kelâm edip medîne-i mezbûre ahâlîsinden işbu hâzırân bi’l-meclis Abdülkerim Beşe b. Cafer ve Mehmed Beşe b. Hasan nâm kimesneler yedlerinde yedimde olan hüccet-i şer‘iyye nâtıka olduğu üzre yüz on yedi re’s koyunum olmağla zikr olunan yüz on yedi re’s koyunlarımı beynimizde [149a] ma‘lûm kuzuları ile mezbûr Muslu Beşe’ye tarafeynden îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile iki yüz elli esedî guruşu bi safkatin vâhidetin bey‘ edip ol dahi ber vech-i muharrer iştirâ ve kabûl ettiğinden sonra semeni olan meblağ-ı mezbûr iki yüz elli esedî guruşu mezbûr Muslu Beşe yedinden tamâmen ahz u kabz edip mârrü’z-zikr koyunları kuzuları ile mezbûrân Abdülkerim Beşe ve Mehmed Beşe’den mahallinde kabz ve tasarrufa mezbûr Muslu Beşe’yi taslît edip mezbûrân Abdülkerim Beşe ve Mehmed Beşe dahi sâlifü’z-zikr yüz on yedi re’s koyunları kuzuları? ile ma‘an mezbûr Muslu Beşe’ye teslîme ta‘ahhüd eylediler ba‘de’l-yevm mârrü’z-zikr koyunlar kuzuları ile mezbûr Muslu Beşe’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tesâdiki’ş-şer‘î merkūm Ahmed Beşe i‘âde-i kelâm edip mezbûrân Abdülkerim Beşe ve Mehmed Beşe sâlifü’z-zikr yüz on yedi koyunu kuzularıyla merkūm Muslu Çelebi’ye teslîm eylediklerinden sonra zikr olunan koyunlara ve kuzulara müte‘allika cemî‘ da‘vâdan mezbûrân Abdülkerim Beşe ve Mehmed Beşe’nin zimmetlerini ibrâ-i âmm-ı kātı‘ü’n-nizâ‘la ibrâ ve iskāt eyledim dedikde mâ hüve’l-vâki‘ bi’t-taleb ketb olundu. Fi’l-yevmi’s-sâdis aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: El-Hâc Ömer b. Mehmed, Mehmed Beşe b. Bayram, el-Hâc Yusuf b. Pîrî, Ahmed b. Mustafa, Mehmed b. Sefer, Mustafa Çelebi seroda.