İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 502 Hüküm no: 537 Orijinal metin no: [149a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. Çolak Hüseyin’in hür olduğunun tesbit edildiği İşbu orta boylu açık kaşlı ala gözlü rıkk-ı sâbıkını mu‘terife bâ‘isetü hâze’l-kitâb Ayşe bt. Çolak Hüseyin nâm mühtediye meclis-i şer‘-i şerîfde rakīk olmak üzre kendiye vâzı‘ü’l-yed olan esirci Mehmed b. Hasan nâm kimesne mahzarında üzerine da‘vâ ve takrîr-i kelâm edip ben medîne-i Silistre’de iskele kurbunda Hisar mahallesi sâkinelerinden hürretü’l-asl olan Nabe bt. Noyaşko nâm Nasrâniyenin hürretü’l-asl olan Çolak Hüseyin b. Abdullah nâm mühtedînin firâşından hâsıla sadriye kızı olup hürretü’l-asl iken, mezbûr Mehmed rakīk olmak üzre bi gayri hakkın bana vaz‘-ı yed eder hâlâ mezbûr Mehmed’e suâl olunup üzerimden yed-i mubtılasının kasr ve izâlesine tenbîh olunup sebîlim tahliyye olunmak matlûbumdur dedikde gıbbe’s-suâl mezbûr Mehmed cevâbında mahmiye-i İstanbul’da Âbid [Abdi] Çelebi mahallesi sâkinelerinden ismi ma‘lûmum olmayan bir hâtun târih-i kitâbdan on beş gün mukaddem mevsûfe-i mezbûreyi rakīk olmak üzre yüz yirmi guruş semen-i makbûza bana bey‘ ve teslîm ben dahi iştirâ ve tesellüm etmekle vaz‘-ı yed ederim, vech-i muharrer üzre hürriyeti ma‘lûmum değildir deyicek müdde‘iye-i mezbûreden müdde‘âsını mübeyyine beyyine taleb [149b] olundukda medîne-i mezbûrede Rüstem Çelebi mahallesi ahâlîsinden olup mahmiye-i mezbûrede Balkapanı kurbunda Yenihan’da misâfiren sâkin olan İbrahim Çelebi b. Ahmed ve Şeyh Nasûh mahallesi ahâlîsinden olup mahrûse-i Ga[la]ta’da Kürkçükapısı kurbunda misâfiren sâkin olan Hüseyin Bey b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûre Ayşe medîne-i mezbûrede zikr olunan Hisar mahallesi sâkinelerinden hürretü’l-asl olan Nabe bt. Noyaşko nâm Nasrâniyenin hürrü’l-asl olan Çolak Hüseyin b. Abdullah nâm mühtedînin firâşından hâsıla sadriye kızıdır, hürretü’l-asldır biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini suâl için savb-ı şer‘-i şerîfden irsâl olunan Mevlânâ es-Seyyid Muharrem Efendi b. es-Seyyid İsmail evvelâ zikr olunan Yenihan’a varıp sükkânından Odabaşı Ahmed Çelebi b. Hüsameddin ve Ali Çelebi b. Hasan ve el-Hâc Sefer b. Murtaza ve Mahmud Beşe b. Yusuf ve es-Seyyid Mazhar Çelebi b. es-Seyyid Mehmed ve Sâlih Çelebi b. Mahmud ve Mehmed Çelebi b. Hüseyin nâm kimesnelerden şâhid-i mezbûr İbrahim Çelebi’nin keyfiyyet-i hâlini suâl edip ve sâniyen zikr olunan Kürkçükapısı kurbuna varıp sükkânından el-Hâc Muharrem b. Abdullah ve el-Hâc es-Seyyid Osman b. es-Seyyid Kurd ve el-Hâc Ahmed b. Derviş ve el-Hâc Mehmed b. Arslan ve Odabaşı İbrahim b. Hüseyin ve Ahmed b. Halil ve el-Hâc Mehmed Efendi b. Ahmed nâm kimesnelerden şâhid-i mezbûr Hüseyin Bey’in keyfiyyet-i hâlini suâl eyledikde her biri şâhidân-ı mezbûrân için adl ve makbûlü’ş-şehâdedir deyû haber verdiklerini Mevlânâ-yı mezbûr mahallinde tahrîr ve ma‘an irsâl olunan Musa Çelebi b. Receb ile meclis-i şer‘-i şerîfe gelip alâ vukū‘ihi inhâ ve takrîr etmekle sırren ve alenen ta‘dîl ve tezkiyye olunduklarından sonra şehâdetleri makbûle olmağın mûcebince müdde‘iye-i mezbûre Ayşe’nin ber vech-i muharrer hürriyetine ba‘de’l-hükmi’ş-şer‘î üzerinden yed-i mubtılasının kasr ve izâlesine mezbûr Mehmed’e tenbîh olunup mezbûre Ayşe’nin sebîli tahliyye olunmağın mâ vaka‘a bi’t-taleb ketb olundu. Fi’l-yevmi’s-sâbi‘ aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mustafa b. Abdullah, Hüseyin b. İbrahim, Mehmed b. Hasan, Mehmed Beşe b. Mustafa, Murtaza Ağa b. Abdurrahman, Ebûbekir b. Hüseyin, Osman b. Ömer ve gayruhüm mine’l-hâzırûn.