İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 503 Hüküm no: 538 Orijinal metin no: [150a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Esmâ bt. Abdülkadir’in terekesinden azatlı kölesi Nâzenin bt. Abdullah’ın herhangi bir şey alarak gizlemediği Fi’l-asl vilâyet-i Anadolu’da Ankara sancağında Çorbacı kazâsına tâbi‘ Beyhamamı nâm karyeden olup mahmiye-i İstanbul’da Sultan Selim câmi‘i kurbunda Debbâğ Yunus mahallesinde sâkine iken bundan akdem fevt olan Esmâ bt. Abdülkādir nâm hâtunun verâseti, li ebeveyn er karındaşları Nasûh ve İsmail nâm kimesneye münhasıra olduğu şer‘an sâbit ve müte‘ayyin oldukdan sonra mezbûr Nasûh’un sulbî kebîr oğlu ve tarafından husûs-ı âti’l-beyâna vekîl olup vekâleti karye-i mezbûre sükkânından olup hâlâ mahmiye-i mezbûrda Rahîfî medresesinde sâkin olan Osman b. Muslu ve Yunus b. Ahmed nâm kimesneler şehâdetleri ile şer‘an sâbite olan Ahmed nâm kimesne meclis-i şer‘-i şerîfde müteveffât-ı mezbûrenin mu‘takası olan Nâzenin bt. Abdullah nâm hâtun mahzarında bi’l-vekâle üzerine da‘vâ ve takrîr-i kelâm edip müteveffât-ı mezbûre Esmâ Hâtun vefât ettikde müteveffât-ı mezbûrenin terekesinden beş yüz yaldız ve yirmi lengerî sahanı ve yirmi aded ipek kenarlı gömleğini ve otuz top ipek kenarlı keten bezi ve beş çuka serhaddî ferâce ve beş kebîr sini ve yirmi beş münakkaş makrama ve bir gaşşân seccâdesi on kumaş yorgan ve beş orta kaliçesi ve iki altın hâtem ve bir altın saçbağını fuzûlen ahz ve ihfâ eylemişdi hâlâ suâl olunup meblağ-ı mezbûrdan eşyâ-i mezbûreden babam ve müvekkilimin nısf hissesi alıverilmek matlûbumdur dedikde gıbbe’s-suâl [ve] akībe’l-inkâr, müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz ile istihlâf etmeğin mezbûre Nâzenin’e müteveffât-ı mezbûrenin terekesinde beş yüz yaldız altını ile eşyâ-i mezkûresini fuzûlen ahz ve ihfâ etmeyip üzerine bî-vech zamân? lâzım olmadığına yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin müdde‘î-i mezbûr bilâ-beyyine bî-vech mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’l-hâdî aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Osman b. Şaban, Abdullah Efendi b. Mehmed el-İmâm, Ahmed Beşe b. Mehmed, Mehmed Çelebi b. İsmail, Ali b. Şaban, Hasan Çelebi b. Abdullah ve gayruhüm.