İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 504 Hüküm no: 539 Orijinal metin no: [150a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. İbrahim’in boşandığı kocası İsmail Bey b. Ahmed ile mehir alacağı konusunda sulh olduğu Medîne-i Ebâ Eyyûb-i Ensârî mahallâtından Davud Ağa mahallesi sâkinelerinden Fâtıma bt. İbrahim nâm hâtun zevc-i mutallıkı bâ‘is-i hâze’l-kitâb İsmail Bey b. Ahmed nâm kimesne mahzarında ikrâr ve takrîr-i kelâm edip mezbûr İsmail Bey târih-i kitâbdan sekiz ay mukaddem beni bâyinen tatlîk etmekle zimmetinde mütekarrir ve ma‘kūdun-aleyh olan yedi bin akçe mehr-i müeccelim mezbûr İsmail Bey’den bundan akdem da‘vâ ve taleb ettiğimde ol dahi cevâbında Naime bt. İbrahim nâm hâtun tarafından meblağ-ı mezbûru benden ahz u kabza ve sulh ve ibrâya vekîl etmekle ol dahi vekâletine binâen medîne-i Edirne’de benim ile elli esedî guruş üzerine sulh olup ve bedel-i sulh olan meblağ-ı mezbûr elli esedî guruşu yedimden kabz edip zimmetimi ibrâetmiş idi deyû def‘ ile mukābele edip ben dahi inkâr etmekle beynimizde münâza‘ât-ı kesîre vukū‘undan sonra muslihûn tavassut edip mezbûr İsmail Bey ile beynimizde otuz beş esedî guruş üzerine inşâ-i akd-i sulh ettiklerinde ben dahi meblağ-ı mezbûru kabûl ve bedel-i sulh olan meblağ-ı mezbûr otuz beş esedî [guruşu] yedinden tamâmen ahz u kabz ettiğimden sonra husûs-ı mezbûra müte‘allika da‘vâdan ben mezbûr İsmail Bey’in zimmetini ibrâ ve iskāt edip mezbûr İsmail Bey dahi meblağ-ı mezbûr otuz beş esedî guruşa müte‘allika de‘âvâdan mezbûre Naime’nin zimmetini ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Nasûh Efendi b. Abdüsselâm, Receb Beşe b. Mustafa, Halil Çelebi b. …?, Mustafa Çelebi b. Şaban, el-Hâc İbrahim b. Mustafa.