İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 508 Hüküm no: 545 Orijinal metin no: [152a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Fâtıma bt. Murad’ın kızı Hanife’nin, annesinden kalan miras hissesini diğer vâris İsmihan Hâtun’dan sulh yoluyla aldığı Mahmiye-i İstanbul’da Servi mahallesinde sâkine iken bundan akdem vefât eden Fâtıma bt. Murad nâm hâtunun verâseti sadriye kebîr[e] kızı Hanife ve sulbî sagīr oğlu Abdi’ye münhasıra olup ba‘dehu sagīr-i mezbûr Abdi dahi vefât edip verâseti li ebeveyn kız karındaşı mezbûre Hanife’ye münhasıra olduğu şer‘an sâbit oldukdan sonra mezbûre Hanife tarafından husûs-ı âti’l-beyâna vekîli olduğu zâtını ma‘rifet-i şer‘iyye ile ârifân Şaban Beşe b. Ramazan ve mezbûre Hanife’nin zevci Ali Beşe b. Mehmed nâm kimesneler şehâdetleri ile şer‘an sâbite olan el-Hâc Mustafa b. Ali nâm kimesne meclis-i şer‘-i şerîfde müteveffât-ı mezbûrenin kız karındaşı bâ‘isetü hâze’l-kitâb İsmihân nâm hâtun mahzarında ikrâr ve takrîr-i kelâm edip müteveffât-ı mezbûre Fâtıma’nın mezbûre İsmihân Hâtun’dan meblağ-ı mezbûru bundan akdem da‘vâ ve taleb etmekle ol dahi cevâbında kaziyye minvâl-i muharrer üzre olduğunu ikrâr, lâkin sagīr-i mezbûr Abdi’nin hayâtında kıbel-i şer‘den nafaka ve kisvesi için yevmî altışar akçe takdîr olmağla iki senede meblağ-ı mezbûrun otuz altı guruşunu sagīr-i mezbûrun nafaka ve kisvesine sarf edip bâkī dokuz esedî guruşu sagīr-i mezbûrun otuz esedî guruşu techîz ve tekfînine sarfetmiş idim demekle, beynlerinde münâza‘ât-ı kesîre vukū‘undan sonra muslihûn tavassut edip mezbûre İsmihân ile beynlerinde dokuz esedî guruş üzerine inşâ-i akd-i sulh ettiklerinde müvekkilem mezbûre Hanife dahi sulh-ı mezbûru kabûl ve bedel-i sulh olan meblağ-ı mezbûr dokuz esedî guruşu yedinden tamâmen ahz u kabz eyledi ba‘de’l-yevm müteveffiyân-ı mezbûrânın terekelerine müte‘allika de‘âvâdan müvekkilem mezbûre Hanife mezbûre İsmihân’ın zimmetini ibrâ ve iskāt edip ve mezbûre İsmihân dahi müvekkilem mezbûrenin zimmetini ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâdis aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Es-Seyyid Mehmed b. es-Seyyid İbrahim, Mustafa Ağa b. Mehmed, Mehmed Çelebi b. Ahmed, Abdullah Efendi b. el-Hâc Veli, İbrahim Çelebi b. Ahmed Beşe, mumcu Derviş ve gayruhüm.