İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 509 Hüküm no: 546 Orijinal metin no: [152a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Çelebi b. Murad’ın Marine bt. Sanam’dan alacaklı olduğu Mahmiye-i İstanbul’da Mimar Sinan mahallesi sâkinlerinden bâ‘is-i hâze’l-kitâb Ali Çelebi b. Murad nâm kimesne meclis-i şer‘-i şerîfde Marine bt. Sanam nâm Nasrâniye muvâcehesinde üzerine da‘vâ ve takrîr-i kelâm edip mezbûre Marine zimmetinde cihet-i karz-ı [152b] şer‘îden kırk esedî guruş ve yedimden iştirâ ve kabz eylediği bir gömlek ve bir don ve bir münakkaş uçkur bahâsından yedi esedî guruş min haysi’l-mecmû‘ hakkım olan kırk yedi esedî guruşun otuz sekiz esedî guruş üç rub‘unu bundan akdem bana edâ ve teslîm ben dahi yedinden ahz u kabz edip bâkī dokuz esedî guruşu zimmetinde kalmış idi hâlâ suâl olunup meblağ-ı bâkī-i mezbûrun alıverilmesi matlûbumdur dedikde gıbbe’s-suâl mezbûre Marine cevâbında kaziyye minvâl-i muharrer üzre olup müdde‘î-i mezbûrda elân zimmetinde bâkī dokuz esedî guruş ve bir rub‘ vâcibü’l-edâ ve lâzımü’l-kazâ deyni olduğunu bi tav‘ihâ ikrâr ve i‘tirâf etmeğin mûcebince meblağ-ı bâkī-i mezbûr dokuz esedî guruş ve bir rub‘u müdde‘î-i mezbûra edâ ve teslîme merkūme Marine’ye tenbîh olunmağın mâ vaka‘a bi’t-taleb ketb olundu. Fi’l-yevmi’s-sânî min şehri Rebî‘ilâhir li sene seb‘a ve semânîn ve elf. Şuhûdü’l-hâl: Veli Bey b. Mahmud, Osman Çelebi b. Ömer, Ebûbekir b. Hüseyin, İbrahim b. Mustafa, Ali b. Şaban.