İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 510 Hüküm no: 547 Orijinal metin no: [152b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ali Bey b. Halil Çavuş’un eski Maraş kadısı Abdürrahim Efendi b. Abdullah’ta olan alacağını aldığı Vilâyet-i Anadolu’da medîne-i Maraş’da Karamanlı mahallesi ahâlîsinden Ali Bey b. Halil Çavuş tarafından husûs-ı âti’l-beyâna vekîl olduğu Mehmed Bey b. Hüseyin ve Cafer b. Süleyman nâm kimesneler şehâdetleri ile şer‘an sâbit olan İbrahim Bey b. Hızır nâm kimesne meclis-i şer‘de, sâbıkan medîne-i mezbûre kadısı olan umdetü’l-mevâli’l-izâm bâ‘isü’l-vesîka Abdürrahim Efendi b. Abdullah’ın oğlu ve tarafından husûs-ı âtîye vekîl olduğu Ömer Bey b. Habib ve Mahmud b. Nasûh şehâdetleri ile sâbit olan Ebûbekir Efendi mahzarında bi’l-vekâle ikrâr ve takrîr-i kelâm edip mûmâ-ileyh Abdürrahim Efendi bundan akdem medîne-i mezbûrede kadı iken müvekkilim mezbûr Ali Bey’in beynlerinde ma‘lûm sulh hücceti için ecr-i mislinden ziyâde bi gayri hakkın yetmiş esedî guruşunu ahz u kabz ettiğinden sonra mezbûr Ali Bey müvekkil-i müşârün-ileyh Abdürrahim Efendi’den ber vech-i muharrer makbûzu olan meblağ-ı mezbûr yetmiş guruşu taleb ve da‘vâ eylediğinde, ol dahi inkâr etmeğin beynlerinde nizâ‘-ı küllî vukū‘undan sonra muslihûn tavassut edip beynlerinde on esedî guruş ile meclis-i sulhde mevcûde bir kebîr seccâde üzerine inşâ-i akd-i sulh eylediklerinde mezbûr Ali Bey dahi sulh-ı mezbûru kabûl ve bedel-i sulh olan on guruş ile seccâde-i mezbûreyi müvekkil-i mûmâ-ileyh yedinden ahz u kabz edip husûs-ı mezbûra ve sâir beynlerinde cereyân eden hukūk-ı ma‘lûme ve mechûleye müte‘allika cemî‘ de‘âvî ve mütâlebâtdan merkūm Abdürrahim Efendi’nin zimmetini ibrâ-i âm ile ibrâ ve iskāt eyledi dedikde gıbbe’t-tasdîk, mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ömer Bey b. Habib, Mahmud b. Nasûh, Cafer b. Abdullah, el-Hâc Sefer b. Feyzullah, Mustafa Efendi b. ( ).