İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 510 Hüküm no: 548 Orijinal metin no: [152b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Bey b. Hüseyin’in evini bey‘ bi’l-istiğlâl yoluyla Seydî Bey Vakfı mütevellisi İmam Ali Efendi b. Süleyman’a sattığı Mahmiye-i İstanbul’da Seydî Bey mahallesi sâkinlerinden Mustafa Bey b. Hüseyin nâm kimesne meclis-i şer‘-i şerîfde merhûm Seydî Bey vakfına bi’l-fi‘l mütevellî olan bâ‘is-i hâze’l-kitâb İmâm Ali Efendi b. Süleyman nâm kimesne mahzarında ikrâr ve takrîr-i kelâm edip yedimde mülküm olup mahalle-i mezbûrede vâki‘ bir tarafdan ba‘zan Saraylı nâm hâtun ve ba‘zan Abdullah Çelebi mülkleri ve bir tarafdan Mehmed Çelebi nâm kimesne mülkü ve bir tarafdan yirmi sekizinci cemâ‘ate mahsûs odada mevkūfe nukūda mütevellî olan [153a] Yakub Beşe’ye bi tarîki’l-istiğlâl bey‘ ettiğim mülk-i âharım ve bir tarafdan tarîk-i âm ile mahdûd, dâhiliyyesinde iki bâb oda ve iki sofa ve bahçesi ve hâriciyyesinde fevkānî oda ve ahır ve sofasını ve kenîfi müştemil menzilimi, bi cümleti’t-tevâbi‘ ve’l-levâhık mütevellî-i merkūm Ali Efendi’ye bi tarîki’l-istiğlâl üç yüz yetmiş [beş] guruşa târih-i kitâb senesi Muharremü’l-harâmı’nın üçüncü günü bey‘ ve teslîm ol dahi vech-i muharrer iştirâ ve tesellüm ettiğinden sonra semen-i mezbûr üç yüz yetmiş beş guruşu yedinde olan mâl-ı vakf-ı mezbûrdan bana def‘ ve teslîm ben dahi yedinden tamâmen ahz [u] kabz ettiğimden sonra mütevellî-i mezbûr menzil-i mahdûd-ı mezbûru senede elli beş guruş üç rub‘ olmak üzre yevm-i mezbûrdan iki sene tamâmına değin yüz on bir buçuk guruşa bana îcâr ve teslîm ben dahi vech-i muharrer üzre i[stî]câr ve tesellümetmiş idim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’[l-yevmi’]s-sâbi‘ aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Çelebi b. İbrahim, Receb Beşe b. Abdullah, Ahmed Beşe b. Abdi, Hüseyin Beşe b. Abdullah, İbrahim Çelebi b. Mehmed, Ahmed Çelebi b. İsmail.