İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 511 Hüküm no: 549 Orijinal metin no: [153a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Elife ve Bâkiye’nin İbrahim Çelebi Vakfı’na ait oda ve dükkânlardaki tasarruf haklarını Abdullah b. Abdurrahman’a devrettikleri Vilâyet-i Anadolu’da Trabzon sancağında Maçka kasabasında Zeyne mahallesi sâkinelerinden Elife ve Bâkiye bintey Abdülmennân nâm hâtunlardan husûs-ı âti’l-beyâna vekâlet iddi‘â eden Bostan Beşe b. Mustafa nâm kimesne meclis-i şer‘-i şerîf-i Nebevî ve mahfil-i dîn-i münîf-i Mustafavî’de, mahmiye-i İstanbul’da -suyyinet ani’l-ufûl-’de vâki‘ Sultan Selim Hân câmi‘-i şerîfi kurbunda sâkin Abdullah b. Abdurrahman nâm kimesne mahzarında tarafından husûs-ı câ’îye vekîl olup nehc-i mu‘teber-i mer‘î üzre mahzar-ı hasm-ı câhid-i şer‘îde şer‘an vekâleti sâbite olan Şaban Halîfe b. Hüseyin nâm kimesne mahzarında üzerine da‘vâ ve takrîr-i kelâm edip merhûm İbrahim Çelebi nâm sâhibü’l-hayr vakfından olup icâre-i mu‘accele-i ma‘lûme ve yevmî buçuk akçe ücret-i müeccele ile müvekkiletân-ı mezbûretân Elife ve Bâkiye’nin taht-ı tasarruflarında olup mârrü’z-zikr Sultan Selim Hân câmi‘-i şerîf kurbunda vâki‘ ve müvekkil-i mezbûr Abdullah’a intimâ’ ile tahdîd ve tavsîfden müstağnî fevkānî bir bâb odayı [ve] tahtında bir bâb attâr dükkânı ile âhara tefvîz vekâlet-i mahkiyem hasebiyle müvekkil-i mezbûr Abdullah’a târih-i kitâbdan on gün mukaddem kırk beş kıt‘a esedî guruşa vakf-ı mezbûr mütevellîsi ma‘rifetiyle ferâğ ve tefvîz eylediğimde, ol dahi vech-i muharrer üzre tefevvüz ve kabûl eylemiş idi hâlâ bedel-i ferâğ olan meblağ-ı mezkûrü’n-na‘t kırk beş esedî guruşu müvekkil-i merkūmdan taleb eylediğimde edâdan imtinâ‘ eder suâl olunup meblağ-ı mezbûru bana teslîme vekîl-i merkūma tenbîh olunmak matlûbumdur dedikde gıbbe’s-suâl vekîl-i mezbûr Şaban Halîfe cevâbında fi’l-hakīka [153b] müvekkil-i mezbûr sâlifü’z-zikr oda ile dükkânı vech-i muharrer üzre tefevvüz eylediğini ikrâr, lâkin mezbûr Bostan Beşe’nin müvekkiletân-ı mezbûretân Elife ve Bâkiye tarafından mârrü’l-beyân oda ile dükkânı âhara ferâğa vekîl olduğu müvekkilimin ma‘lûmu değildir deyicek müdde‘î-i mezbûr Bostan Beşe’den vekâlet-i mahkiyesin mübeyyine beyyine taleb olundukda udûl-ı ahrâr-ı ricâl-i müslimînden olup yine mârrü’z-zikr Zeyne mahallesi sâkinlerinden zât-ı mezbûretân[ı] ma‘rifet-i şer‘iyye ile ârifân Mehmed Beşe b. Ahmed ve Fazlı Beşe b. Mehmed nâm kimesneler li ecli’ş-şehâde mahfil-i şer‘a hâzırân olup isre’l-istişhâd, fi’l-vâki‘ müvekkiletân-ı mezbûretân Elife ve Bâkiye sâlifü’z-zikr oda ile dükkânlarını vakf-ı mezbûr mütevellîsi ma‘rifetiyle âhara ferâğ ve tefvîze bizim huzûrumuzda mezbûr Bostan Beşe tarafından vekîl ve nâib-i menâb ve ta‘yîn eylediklerinde ol dahi kabûl eylemiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde ba‘de’t-ta‘dîl ve’t-tezkiyye şehâdetleri hayyiz-i kabûlde vâkı‘a olmağın mûcebiyle bedel-i mezbûr kırk beş esedî guruş vekîl-i mezbûr Bostan Beşe’ye edâ ve teslîme vekîl-i mezbûr Şaban Hoca’ya tenbîh birle, mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Halil b. Abdullah, Mustafa Beşe b. Abdullah, Bayram Beşe b. Abdullah, İbrahim Çelebi b. ( ) Serbölük ve gayruhüm.