İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 512 Hüküm no: 550 Orijinal metin no: [153b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mehmed b. Ali’nin Kasım Ağa b. Abdullah’ta alacağının olmadığı Mahmiye-i İstanbul’da Şehzâde câmi‘-i şerîfi kurbunda Camcı Ali mahallesi sâkinlerinden Mehmed b. Ali nâm kimesne meclis-i şer‘-i şerîfde bâ‘is-i hâze’l-kitâb fahrü’l-akrân Kasım Ağa b. Abdullah nâm kimesne mahzarında üzerine da‘vâ ve takrîr-i kelâm edip bundan akdem bir husûsun temşiyyeti için bi gayri hakkın dört yaldız altını ile otuz esedî guruşumu merkūm Kasım Ağa’ya def‘ ve teslîm ol dahi ahz u kabzetmiş idi hâlâ merkūm Kasım Ağa’ya suâl olunup meblağ-ı mezbûr dört yaldız altını ile otuz esedî guruşumu bana edâ ve teslîme tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda ityân-ı beyyineden izhâr-ı acz edip istihlâf etmeğin mezbûr Kasım Ağa’ya meblağayn-ı mezbûreyni ber vech-i muharrer müdde‘î-i mezbûr yedinden ahz u kabz etmediğine yemîn teklîf olundukda ol dahi alâ vefki’l-mes’ûl yemîn billâhi’l-aliyyi’l-a‘lâ etmeğin mûcebince müdde‘î-i mezbûr bilâ-beyyine ber vech-i muharrer mu‘ârazadan men‘ olunup mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Çelebi b. Abdullah, İbrahim Çelebi b. Mehmed, el-Hâc Kemaleddin Ağa b. Müyesser, Hüseyin Çelebi b. Üveys ve gayruhüm.