İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 513 Hüküm no: 551 Orijinal metin no: [153b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şam eski kadısı Abdülbâki Efendi’nin bahçesini eski gümrük emini Hüseyin Ağa b. el-Hâc Yusuf’a sattığı Husûs-ı âti’l-beyânın mahallinde ketb ü tahrîr iltimâs olunmağın savb-ı şer‘-i enverden Mev[lâ]nâ Abdurrahman Efendi b. İbrahim irsâl olunup ol dahi kıdvetü’l-ulemâ’i’l-izâm zübdetü’l-fuzalâ’i’l-fihâm zü’l-kadr ve’l-ihtirâm sâbıkan Şâm-ı şerîf-i encâm kadısı olan Abdülbâkī Efendi hazretlerinin Dârü’s-saltanati’s-seniyye Kostantıniyye el-mahmiye mahallâtından Kadıçeşmesi kurbunda Altıpoğaça mahallesinde vâki‘ bir tarafdan müşârün-ileyh Abdülbâkī Efendi’nin kendi mülkleri [154a] ve bir tarafdan umdetü’l-mevâli’l-izâm Çeşmizâde Efendi mülkleri ve bir tarafdan mefharü’s-sâdâti’l-kirâm es-Seyyid Mustafa Efendi mülkü ve bir tarafdan merhûm Zâhide Hâtun vakfı olan medrese ile mahdûd eşcâr-ı mülteffeyi hâvî mülk hadîkalarına varıp zeyl-i sütûrda mastûrü’l-esâmî olan müslimîn mahzarlarında akd-i meclis-i şer‘-i mübîn eyledikde müşârün-ileyh Abdülbâkī Efendi meclis-i ma‘kūd-ı mezkûrda sâbıkan gümrük emîni olan mefharü’l-emâcid ve’l-ekârim câmi‘ü’l-mehâmid ve’l-mekârim Hüseyin Ağa b. el-Hâc Yusuf mahzarında bi’t-tav‘i’s-sâf ikrâr ve i‘tirâf edip mülküm olan işbu hadîkadan mûmâ-ileyh es-Seyyid Mustafa Efendi tarafından tûlen ve arzen bi hesâb-ı terbî‘î iki yüz zirâ‘ arsayı ba‘de’l-mesâha cemî‘ tevâbi‘ ve levâhık ve âmme-i hukūk-ı merâfi‘i ile mûmâ-ileyh Hüseyin Ağa’ya bin kıt‘a esedî guruşa tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile bey‘ ve teslîm edip semeni olan meblağ-ı mezbûr bin kıt‘a esedî guruşu mûmâ-ileyh Hüseyin Ağa yedinden tamâmen ahz u kabz eyledim ba‘de’l-yevm hadîka-i memsûha-i mezkûre mûmâ-ileyh Hüseyin Ağa’nın mülk-i müşterâsı ve dâhil-i havza-i tasarrufu olmuşdur, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teber husûs-ı mezkûru Mevlânâ-yı mezbûr mahallinde tahrîr ve ba‘dehu ma‘an irsâl olunan Hasan b. Bayram ve Muslu b. Handan ile meclis-i şer‘a gelip alâ vukū‘ihi inhâ ve takrîr etmeğin mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min Rebî‘ilâhir li sene seb‘a ve semânîn ve elf. Şuhûdü’l-hâl: Umdetü’l-ekâbir ve’l-a‘yân Mehmed b. ( ) Emîn-i matbah-ı âmire hâlâ, Fahrü’l-müderrisînü’l-kirâm Şaban Efendi, Zahrü’l-müderrisînü’l-fihâm Abdülkādir Efendi, Fahrü’l-kuzât Receb Efendi.