İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 515 Hüküm no: 553 Orijinal metin no: [154b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Dilaver Bey b. Abdullah’ın Ramazan Çelebi b. Şaban’da alacağının kalmadığı Mahrûse-i Ga[la]ta’da Yazıcı mahallesinde sâkin iken bundan akdem vefât eden Mustafa b. Ali Ağa nâm sagīrin hayâtında kıbel-i şer‘den mansûb vasîsi olan Dilaver Bey b. Abdullah nâm kimesne meclis-i şer‘-i şerîfde mahrûse-i mezbûreye tâbi‘ Şahkulu mahallesi sâkinlerinden bâ‘is-i hâze’l-kitâb Ramazan Çelebi b. Şaban nâm kimesne mahzarında ikrâr ve takrîr-i kelâm edip sagīr-i mezbûr Mustafa’nın malından mezbûr Ramazan Çelebi zimmetinde doksan bin akçe hakkı olmağla meblağ-ı mezbûrun kırk üç bin üç yüz otuz sekiz akçesini benden mukaddem sagīr-i mezbûrun vasîsi olan Mehmed Ağa nâm kimesne mezbûr Ramazan Çelebi yedinden ahz u kabz edip ba‘dehu mezbûr Mehmed Ağa vesâyet-i mezbûreden azl olunup ben kıbel-i şer‘den vasî nasb olunduğumda bâkī kalan kırk altı bin altı yüz altmış iki akçesi için târih-i kitâbdan on üç sene mukaddem her biri on dörder akçeye râyic bin üç yüz otuz üç cedîd semen ahz u kabzetmiş idim. Min ba‘d meblağ-ı mezbûr kırk altı bin altı yüz altmış iki akçe-[155a] den mezbûr Ramazan Çelebi zimmetinde bir akçe bâkī kalmamışdır dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ahmed Efendi b. Mustafa, Ömer Efendi b. el-Hâc Ali, Ali Beşe b. Osman, el-Hâc Ali b. Mehmed, el-Hâc Ali b. İvaz ve gayruhüm.