İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 515 Hüküm no: 554 Orijinal metin no: [155a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ekmekçi Tevkil v. Asvador’un dolabındaki parayı alan hizmetkârı Diyarbakırlı Murtaza b. Süleyman’ın borcunu ödeyeceği Mahmiye-i İstanbul’da Ayazmakapısı kurbunda vâki‘ ekmekçi fırınında ekmekçi olan bâ‘is-i hâze’s-sifr Tevkil v. Asvadur nâm zimmî meclis-i şer‘-i şerîf-i enverde hizmetkârı olan Diyârbekirli Murtaza b. Süleyman nâm kimesne mahzarında üzerine da‘vâ ve takrîr-i kelâm edip mezbûr Murtaza hizmetimde iken târih-i kitâbdan bir gün mukaddem ba‘de’l-asr dolabım içinde yirmi beş esedî guruşumu ahz u kabz etmeğin suâl olunup meblağ-ı mezbûrun alıverilmesi matlûbumdur dedikde gıbbe’s-suâl mezbûr Murtaza cevâbında?, fi’l-hakīka müdde‘î-i mezbûrun ber vech-i muharrer yirmi beş esedî guruşunu ahz u kabz eyledim deyû tâyi‘an ikrâr ve i‘tirâf etmeğin mûcebince meblağ-ı mezbûr yirmi beş esedî guruşu müdde‘î-i mezbûra def‘ ve teslîme merkūm Murtaza’ya? tenbîh olunmağın mâ vaka‘a bi’t-taleb ketb olundu. Fi’l-yevmi’s-sâbi‘ aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ali Beşe b. Ahmed, el-Hâc Mustafa b. Ali, Halil Beşe b. Muslu, Ali Beşe b. Şaban, Mehmed b. Muharrem ve gayruhüm.