İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 518 Hüküm no: 556 Orijinal metin no: [156a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Bakkal Panayot’un kendisini bıçakla yaralayan yeniçeri Veli Beşe b. Şaban ile sulh olduğu Mahmiye-i İstanbul’da Çıkrıkçı Kemal mahallesinde bakkal olan Panayot nâm zimmînin babası ve tarafından husûs-ı âti’l-beyâna bimâ hüve’n-nehci’s-sübût vekîl olduğu şer‘an sâbite olan Todori v. Nikola nâm zimmî meclis-i şer‘-i şerîfde Dergâh-ı âlî yeniçerilerinden yirmi dokuzuncu ağa bölüğüne mahsûs oda yoldaşlarından bâ‘is-i hâze’l-kitâb Veli Beşe b. Şaban nâm kimesne mahzarında bi’l-vekâle ikrâr ve takrîr-i kelâm edip târih-i kitâbdan on dört gün mukaddem oğlum mezbûr Panayot’un sağ memesi üzerine mezbûr Veli Beşe kara saplı bir Macar bıçağı ile dürtüp cerh etmekle bundan akdem mûceb-i şer‘îsi mezbûr Veli Beşe’den bi’l-vekâle da‘vâ ettiğimde ol dahi inkâr etmeğin beynimizde nizâ‘-ı küllî vukū‘undan sonra muslihûn tavassut edip mezbûr Veli Beşe ile beynimizde on dört esedî guruş üzerine inşâ-i akd-i sulh ettiklerinde ben dahi sulh-ı mezbûr olan meblağ-ı mezbûr on dört guruşu mezbûr Veli Beşe yedinden tamâmen ahz u kabz ettiğimden sonra harc-ı mezbûre ve mâ tahaddese minhu müte‘allika da‘vâdan mezbûr Veli Beşe’nin zimmetini ibrâ-i âmm-ı kātı‘ü’n-nizâ‘ ile ibrâ ve iskāt edip mezbûr Veli Beşe dahi meblağ-ı mezbûra müte‘allika cemî‘ da‘vâdan benim zimmetimi ve oğlum mezbûr Panayot’un zimmetini ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Hüsameddin Odabaşı, Ali Beşe b. Abdülkādir, Zülfikār Beşe seroda ve gayruhüm.