İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 519 Hüküm no: 557 Orijinal metin no: [156a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Es-Seyyid Ali Çelebi b. Yusuf’un 53. cemaat odası para vakfından evini rehin gösterip borç aldığı Mahrûse-i Galata’ya tâbi‘ kasaba-i Kasımpaşa’da Kulaksız mahallesinde sâkin es-Seyyid Ali Çelebi b. Yusuf nâm kimesne meclis-i şer‘-i şerîf-i enverde Dergâh-ı âlî yeniçerilerinin elli üçüncü cemâ‘atine mahsûs odanın nukūd-ı mevkūfesine bi’l-fi‘l mütevellî olan bâ‘is-i hâze’l-vesîka Hüseyin Odabaşı b. İbrahim mahzarında ikrâr ve takrîr-i kelâm edip mezbûr Hüseyin Odabaşı mâl-ı vakf-ı mezbûrdan yüz yetmiş esedî guruşu bana ikrâz ve teslîm ben dahi iktirâz ve kabz ve tesellüm ettiğimden sonra mukābelesinde yedimde mülk ve hakkım olup mahalle-i mezbûrede vâki‘ bir tarafdan Hüseyin Reis b. Abdullah mülkü ve bir tarafdan Emine Hâtun mülkü ve bir tarafdan Ali Kapudan mülkü ve bir tarafdan tarîk-i âm ile mahdûd büyût-ı adîdeyi müştemil menzilimi mütevellî-i mezbûr Hüseyin Odabaşı’ya rehin vaz‘ ve teslîm ol dahi [156b] irtihân ve kabz ve tesellüm eyledi dedikde gıbbe’t-tasdîki’ş-şer‘î zâtları ma‘rifet-i şer‘iyye ile ârifân Mahmud Ağa b. Ahmed ve Süleyman b. Derviş nâm kimesneler ta‘rîfleri ile mu‘arrefe olup mezbûr es-Seyyid Ali Çelebi’nin zevcesi işbu hâzıre bi’l-meclis İsmihân bt. Mahmud ve kızı Ayşe ve halası kızı Neslihan bt. Süleyman ve kız karındaşı Rahime nâm hâtunlar ile dâmâdı İbrahim b. Hasan nâm kimesne meblağ-ı mezbûr yüz yetmiş esedî guruşa her biri emir ve kabûlü hâviye kefâlet-i sahîha-i şer‘iyye ile kefîl olmağın mâ hüve’l-vâki‘ bi’t-taleb ketb olundu. Fi’l-yevmi’t-tâsi‘ aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mahmud Ağa b. Ahmed, Süleyman Çelebi b. Derviş, Yahya Çelebi b. Mehmed, başkorucu İbrahim Beşe, el-Hâc Ali Beşe seroda ve gayruhüm.