İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 519 Hüküm no: 558 Orijinal metin no: [156b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havvâ bt. Abdullah ile Halil Beşe b. Abdullah’ın muhâla‘a yoluyla boşandıkları Mahmiye-i İstanbul’da Servi mahallesi sâkinelerinden zâtı ma‘rifet-i şer‘iyye ile ârifân el-Hâc Osman b. Bayram ve Hüseyin Bey b. Ali nâm kimesneler ta‘rîfleri ile mu‘arrefe olan Havvâ bt. Abdullah nâm hâtun meclis-i şer‘-i şerîf-i lâzımü’t-teşrîfde, zevc-i dâhili bâ‘is-i hâze’l-kitâb Halil Beşe b. Abdullah nâm kimesne mahzarında ikrâr ve takrîr-i kelâm edip zevcim mezbûr Halil Beşe ile zimmetinde mütekarrir ve ma‘kūdun-aleyh olan iki bin iki yüz akçe mehr-i müeccelim ve nafaka-i iddet-i ma‘lûmem üzerlerine ve me’ûnet-i süknâm dahi kendi üzerime olup ve bedel-i hul‘ bin akçe vermek üzre muhâla‘a-i sahîha-i şer‘iyye ile muhâla‘a edip ol dahi muhâla‘a-i mezbûru kabûl ettiğinden sonra hukūk-ı zevciyyete müte‘allika da‘vâdan zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledim dedikde gıbbe’t-tasdîki’ş-şer‘î mezbûr Halil Beşe dahi meclis-i mezbûrede mezbûre Havvâ mahzarında ikrâr edip bedel-i hul‘-ı mezbûr bin akçeyi mezbûre Havvâ yedinden ahz u kabz eylediğimden sonra ben dahi mezbûrenin zimmetini hukūk-ı zevciyyete müte‘allika âmme-i de‘âvîden ibrâ ve iskāt eyledim dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sâmin aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: El-Hâc Osman b. Bayram, Hüseyin Bey b. Ali, İbrahim Çelebi b. Mehmed, Mustafa Çelebi b. Hasan ve gayruhüm.