İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 520 Hüküm no: 559 Orijinal metin no: [156b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Efendi b. Mehmed’in vefat eden Ahmed Beşe b. Mustafa’da olan alacağının terekesinden ödenmesi gerektiği Mahmiye-i İstanbul’da Bıçakçılar mahallesi sâkinlerinden Mustafa Efendi b. Mehmed nâm kimesne meclis-i şer‘-i şerîfde vilâyet-i Anadolu’da Kastamonu sancağında Küre-i Nühâs kazâsına tâbi‘ Karaçam nâm karyede sâkin iken bundan akdem vefât eden Ahmed Beşe b. Mustafa’nın [verâseti] li eb karındaşı Ali Beşe ile zevce-i metrûkeleri Döne bt. Mustafa ve Emine bt. el-Hâc Muslu nâm hâtunlara münhasıra olduğu şer‘an zâhir ve mütehakkik oldukdan sonra müteveffâ-yı mezbûrun terekesine vâzı‘ayi’l-yed olan mezbûrân Ali Beşe ve Döne Hâtun mahzarlarında üzerlerine da‘vâ ve takrîr-i kelâm edip târih-i kitâbdan yirmi bir sene mukaddem müteveffâ-yı mezbûr hayâtında yirmi beş guruşumu ikrâz ve teslîm ol dahi iktirâz ve tesellümetmiş idi hâlâ müteveffâ-yı mezbûrun terekesine vâzı‘ayi’l-yed olan mezbûrân Ali Beşe ve Döne [157a] Hâtun’a suâl olunup müteveffâ-yı mezbûrun terekesinden meblağ-ı mezbûru bana edâ ve teslîme tenbîh olunmak matlûbumdur dedikde gıbbe’s-suâl mezbûrân Ali Beşe ve Döne Hâtun cevâblarında, müteveffâ-yı mezbûrun tereke-i vâfiyesine vâzı‘ayi’l-yed olduklarını ve müteveffâ-yı mezbû[run] târih-i mezbûrda müdde‘î-i mezbûr yedinden ber vech-i muharrer meblağ-ı mezbûr yirmi beş guruşu iktirâz ve tesellüm ettiğini her biri ikrâr ve i‘tirâf etmeğin mûcebince müteveffâ-yı mezbûrun tereke-i vâfiyesinden müdde‘î-i mezbûr Mustafa Efendi’ye meblağ-ı mezbûr yirmi beş guruşu edâ ve teslîm mezbûrân Ali Beşe ve Döne Hâtun’a tenbîh olunmağın mâ vaka‘a bi’t-taleb ketb olundu. Fi’l-yevmi’s-sâmin ve’l-ışrîn min şehri Rebî‘ilevvel li sene seb‘a ve semânîn ve elf. Şuhûdü’l-hâl: Hasan Beşe b. Sefer, Ahmed Çelebi b. Bayram, Mustafa b. Receb, Ramazan b. Musa, Mehmed b. Hızır, Mehmed b. Muslu.