İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 530 Hüküm no: 574 Orijinal metin no: [161a-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İsmihan bt. Mustafa’nın evini Osman Efendi b. Mehmed Efendi’ye sattığı Husûs-ı âti’l-beyânın mahallinde ketb ü tahrîri iltimâs olunmağın savb-ı şer‘-i celîl-i lâzımü’t-tebcîlden bi’l-fi‘l keşf nâibimiz olan Mevlânâ Abdurrahman Efendi b. İbrahim irsâl olunup ol dahi ketebe-i atebe-i aliyye-i Sultânî -dâme masûnen bi’s-savni’s-samadânî-’den olup üçüncü halîfe olan kıdvetü erbâb-ı tahrîr ve’l-kalem Osman Efendi b. Mehmed Efendi’nin Dârü’l-hilâfeti’l-aliyye Kostantıniyye el-mahmiye mahallâtından Nuri Dede mahallesinde vâki‘ menzillerine varıp zeyl-i mastûrda mastûrü’l-esâmî olan müslimîn mahzarlarında akd-i meclis-i şer‘-i mübîn eyledikde mahalle-i mezbûre sâkinelerinden zâtı ma‘rifet-i şer‘iyye ile ârifân Mahmud Efendi b. Mustafa ve Halil Efendi b. İbrahim ta‘rîfleri ile mu‘arrefe olan İsmihân bt. Mustafa nâm hâtun meclis-i ma‘kūd-ı merkūmda, mûmâ-ileyh Osman Efendi mahzarında bi tav‘ihâ ikrâr-ı sahîh-i şer‘î ve i‘tirâf-ı sarîh-i mer‘î kılıp, bey‘-i âti’z-zikrin sudûruna değin silk ve mülkümde münselik olup bir tarafdan küllen mûmâ-ileyh Osman Efendi mülkü ve bir tarafdan ba‘zan çadırcı İbrahim Çelebi mülkü ve ba‘zan Afîfe Hanım mülkü ve bir tarafdan küllen Mûytâb Mehmed mülkü ve bir tarafdan ba‘zan Emine Hâtun ve ba‘zan tarîk-i hâs ile mahdûd hâriciyyede bir fevkānî oda ve bir ahır dâhiliyyede fevkānî bir oda ve tahtânî üç oda ve üç sofa ve iki kenîf ve bir su kuyusu ve eşcâr-ı müsmire ve gayr-ı müsmire hadîkayı müştemil mülk menzilimi, bi cümleti’t-tevâbi‘ ve’l-levâhık ve kâffeti’l-menâfi‘ ve’l-merâfık mûmâ-ileyh Osman Efendi’ye bin iki yüz kıt‘a esedî guruşa tarafeynden îcâb ve kabûlü hâvî ve şurût-ı müfsideden ârî bey‘-i bâtt-ı sahîh-i şer‘î ile bey‘ ve teslîm edip semeni olan meblağ-ı sâlifü’l-beyân bin iki yüz kıt‘a esedî guruşu mûmâ-ileyh Osman Efendi [161b] yedinden bi’t-tamâm ahz u kabz eyledim [min] ba‘d menzil-i mahdûd-ı mezkûr mûmâ-ileyh Osman Efendi’nin mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’l-mu‘teber mezbûre İsmihân’ın zevci Mehmed Ağa nâm kimesne meclis-i ma‘kūd-ı mezkûrda mûmâ-ileyh Osman Efendi’nin mahzarında ikrâr ve takrîr-i kelâm edip işbu menzil-i mahdûd-ı mezkûrun derkine tarafından îcâb ve kabûlü hâviye kefâlet-i sahîha-i şer‘iyye ile kefîl-i zâminim dedikde gıbbe’t-tasdîki’l-mu‘teber husûs-ı mezkûru Mevlânâ-yı mezbûr mahallinde tahrîr ba‘dehu ma‘an irsâl olunan Hasan b. Bayram ve Muslu b. Handan ile meclis-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sânî ve’l-ışrîn min Rebî‘ilâhir li sene seb‘a ve semânîn ve elf. Şuhûdü’l-hâl: Fahrü’l-müderrisînü’l-kirâm Mustafa Efendi b. Mehmed Efendi, zahrü’l-akrân Ali Ağa b. Abdullah, mefharü’l-eimme Abbas Efendi b. Mehmed el-İmâm, el-Hâc Mehmed Efendi el-merhûm, Ahmed Çelebi b. Abdurrahman, Mustafa Bey b. Abdurrahman, Kasım b. Abdullah, Mehmed b. Ahmed ve gayruhüm.