İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 536 Hüküm no: 584 Orijinal metin no: [163b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Seyyid Mehmed Efendi b. İbrahim’in Nişancı Cafer Çelebi mahallesinden Mahmud Bey b. Mehmed’e olan borcunun terekesinden ödenmesi Mahmiye-i İstanbul’da Nişâncı Cafer Çelebi mahallesi sâkinlerinden bâ‘is-i hâze’l-kitâb Mahmud Bey b. Mehmed nâm kimesne meclis-i şer‘-i şerîfde mahmiye-i mezbûrede Emir Buhârî mahallesi sâkinlerinden iken bundan akdem vefât [eden] es-Seyyid Mehmed Efendi b. İbrahim b. Menteşe[’nin] li üm kız karındaşı ve hasren vârisesi olmağla terekesine vâzı‘atü’l-yed olan Şerife Ayşe bt. Aliyyüddin b. es-Seyyid Hasan[’ın] sadrî kebîr oğlu ve tarafından husûs-ı âti’l-beyâna vekîli olduğu zâtını ma‘rifet-i şer‘iyye ile ârifân İbrahim Çelebi b. Ali ve es-Seyyid Mehmed b. es-Seyyid Yahya nâm kimesneler şehâdetleri ile şer‘an sâbit olan es-Seyyid Lütf[ullah] Çelebi b. Mustafa nâm kimesne mahzarında üzerine da‘vâ ve takrîr-i kelâm edip müteveffâ-yı mezbûr es-Seyyid Mehmed Efendi zimmetinde cihet-i deyn-i şer‘îden altmış altı kıt‘a esedî guruş yedimden iştirâ ve kabz eylediği bir kara kılıç semeninden on dört esedî guruş cem‘an seksen esedî guruş hakkım olup hattâ merkūm es-Seyyid Mehmed Efendi hayâtında şuhûd mahzarında ikrâr dahi ettiğinden kable’l-edâ vefât edip zimmetinde kalmağla hâlâ vekîl-i mezbûr es-Seyyid Lütfullah Çelebi’ye suâl olunup meblağ-ı mezbûru müteveffâ-yı mezbûrun tereke-i vâfiyesinden bana müvekkile-i mezbûra edâ ve teslîm etmek üzre tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olup olundukda mahmiye-i mezbûrede Tercüman Yunus mahallesi sâkinlerinden Çakır Beşe b. Abdullah ve Dülgerzâde mahallesi sâkinlerinden Mehmed Çelebi b. Abdullah nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka [164a] müteveffâ-yı mezbûr es-Seyyid Mehmed Efendi hayâtında cihet-i deyn-i şer‘îden altmış altı guruş ve bir kılıç semeninden on dört guruş cem‘an zimmetinde müdde‘î-i mezbûr Mahmud Bey’e vâcibü’l-edâ ve lâzımü’l-kazâ seksen esedî guruş deyni olduğu bizim huzûrumuzda ikrâr ve bizi işhâdetmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde şâhidân-ı mezbûrânın keyfiyyet-i hâllerini sâkin oldukları mahalleleri ahâlîlerinden cem‘-i gafîrden sırren ve alenen ta‘dîl ve tezkiyye olunduklarından sonra şehâdetleri makbûle olup müdde‘î-i mezbûr Mehmed Bey tahlîf-i şer‘î ile tahlîf olundukdan sonra mûcebince meblağ-ı mezbûr seksen esedî guruşunu müteveffâ-yı mezbûrun tereke-i vâfiyesinden müvekkile-i mezbûre Şerife Ayşe müdde‘î-i mezbûr Mahmud Bey’e edâ ve teslîm etmek üzre vekîl-i mezbûr es-Seyyid Lütfullah Çelebi’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Abdullah b. Ahmed, el-Hâc Mehmed b. el-Hâc Receb, Süleyman Beşe b. Mehmed, Veli Bey b. Halil, Musa Efendi b. Mustafa ve gayruhüm.