İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 537 Hüküm no: 585 Orijinal metin no: [164a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Havvâ bt. Mehmed ile Ramazan Çelebi b. Abdullah’ın boşandıkları Mahmiye-i İstanbul’da Altıpoğaça mahallesi sâkinelerinden olup zâtı mahalle-i mezbûre sükkânından Sinan Efendi b. Ali ve Ali Beşe b. Abdullah nâm kimesneler ta‘rîfleri ile mu‘arrefe olan Havvâ bt. Mehmed nâm hâtun meclis-i şer‘-i hatîr-i lâzımü’t-tevkīrde zevc-i dâhili bâ‘is-i hâze’l-kitâb Ramazan Çelebi b. Abdullah nâm kimesne mahzarında ikrâr ve takrîr-i kelâm edip zevcim mezbûr Ramazan Çelebi zimmetinde mütekarrir ve ma‘kūdun-aleyh olan yedi bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve me’ûnet-i süknâm dahi kendi üzerime olmak üzre zevcim mezbûr Ramazan Çelebi ile muhâla‘a-i sahîha-i şer‘iyye ile muhâla‘a edip ol dahi hul‘-i mezbûru kabûl ettikden sonra hukūk-ı zevciyyete müte‘allika âmme-i de‘âvâdan her birimiz âharın zimmetini ibrâ-i âmm-ı kātı‘ü’n-nizâ‘ ile ibrâ ve iskāt eyledik dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Sinan Efendi b. Ali el-Müezzin, Ali Efendi b. Ahmed el-İmâm, Receb Efendi b. Hasan el-Müezzin, Davud Beşe b. Abdullah, Mustafa b. Receb, el-Hâc Yusuf b. Abdullah, Mehmed Beşe b. Süleyman, Abdurrahman Çelebi b. Ali, Mehmed Beşe b. Ahmed ve gayruhüm.