İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 538 Hüküm no: 586 Orijinal metin no: [164b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. İstanbul Rum patriği Bartinos v. Simon’un Atmeydanı’ndaki Sultan Ahmet Medresesi? para vakfına mütevelli olan Ebûbekir Çelebi’ye, daha önceden alınan borcu ödemesi Min hattıhî Atmeydanı kurbunda vâkı‘a medrese-i celîle-i sultâniyye mesâlihi için mevkūfe nukūda berât-ı pâdişâhî ile bi’l-fi‘l mütevellî olan bâ‘is-i hâze’l-kitâb Ebûbekir Çelebi b. Ahmed dîvân-ı kāimmakām-ı hazret-i sadr-ı a‘zamîde akd olunan meclis-i şer‘-i şerîfde hâlâ mahmiye-i İstanbul’da Rum patriği olan Bartinos v. Simon nâm râhib ile Ereğli metrepolidi olan Vartalomyos v. Marti ve Kapıdağı metrepolidi Metrofan v. Dimitri ve İznikmid metrepolidi Tavakinos v. Mikail ve Kayseriye metrepolidi Argor[yos] v. Kalinos ve Kadıköyü metrepolidi Eremya v. Kiricsi ve Amasya metrepolidi Yerasimos v. Kika ve Bursa metrepolidi Kalisnogos v. Diyez ve Midilli metrepolidi Argoryos v. Nikola ve Dimetoka metrepolidi Argoryos v. Françesko ve Kırım metrepolidi Todoyos v. Dimitri ve Ahyolu metrepolidi Danyal v. Petro ve Gördös metrepolidi Kalistos v. Kosta ve Terkos metrepolidi Makaryos v. Sidi ve Ilıca metrepolidi Teodos v. Andon ve İzmir metrepolidi Yadagon v. Yorgi ve Vidin metrepolidi Dimotoyoş v. [Panayot]3 nâm râhibler muvâcehelerinde takrîr-i kelâm ve ta‘bîr ani’l-merâm edip vakf-ı mezbûra sâbıkan mütevellî olan Hasan Bey b. Abdullah nâm kimesne bin seksen iki senesi Muharrem gurresinde yedinde olan vakf-ı mezbûr malından üç bin esedî guruşu mahmiye-i mezbûrede sâbıkan patrik olan Diyonisyos nâm râhibe idâne ve teslîm ol dahi istidâne ve tesellüm ettiğinden sonra meblağ-ı mezbûr üç bin esedî guruş için mezbûr Diyonisyos mütevellî-i mezbûr Hasan Bey’i mezbûr Bartinos üzerine havâle edip mezbûr Bartinos dahi merkūm Hasan Bey ile havâle-i mezbûreyi rızâları ile kabûl ettiklerinden sonra mezbûr Hasan Bey yine mâl-ı vakf-ı mezbûrdan bin sekiz yüz esedî guruşu mezbûr Bartinos’a idâne ve teslîm ve yakut taşlı iki paftalı bir ön kuşağı iki yüz esedî guruşa bey‘ ve teslîm mezbûr Bartinos dahi istidâne ve tesellüm ve iştirâ ve kabz ettiğinden sonra mezbûr Hasan Bey tevliyyet-i mezbûreden azl olunup yerine ben mütevellî nasb olunduğumda, meblağayn-ı mezbûreyn cem‘an beş bin guruş için beni mezbûr Bartinos üzerine havâle edip ol dahi kabûl ettiğinden sonra meblağ-ı mezbûr beş bin guruşa mezbûrûndan her biri emir ve kabûlü hâviye kefâlet ile kefîl olmuşlar idi hâlâ mezbûrûna suâl olunup takrîrleri tahrîr olunmak matlûbumdur dedikde gıbbe’s-suâl patrik-i mezbûr Bartinos [cevâbında] kaziyye tafsîli mürûr eylediği vech üzre olup meblağ-ı mezbûr beş bin guruş için merkūm Hasan Bey mütevellî-i merkūm Ebûbekir Çelebi’yi kendi üzerine havâle ettikde kabûl ettiğini ve hâlâ vakf-ı mezbûra ber vech-i muharrer beş bin esedî guruş deyni olduğunu ikrâr ve i‘tirâf edip mezbûrûn Vartalomyos ve Metrofan ve Tavakinos ve Argoryos [165a] ve E[r]emya ve Yerasimos ve Kalisnogos ve Argoryos ve Todoyos ve Danyal ve Kalistos ve Makaryos ve Teodos ve Yadagon ve Dimotoyoş’dan her biri dahi meblağ-ı mezbûr beş bin guruşa tarafeynden emir ve kabûlü hâviye kefâlet ile kefîl olduklarını ikrâr ve i‘tirâf etmeğin mâ vaka‘a bi’t-taleb ketb olundu. Fi’l-yevmi’r-râbi‘ ve’l-ışrîn min Rebî‘ilâhir li sene seb‘a ve semânîn ve elf. Şuhûdü’l-hâl: Umdetü erbâbü’t-tahrîr ve’l-kalem Hasan Efendi Tezkire-i ûlâ, kıdvetü ashâbü’t-tastîr ve’l-kalem Yusuf Efendi Tezkire-i sâniye, umdetü’l-emâsil ve’l-akrân çavuşbaşı Murad Ağa, fahrü’l-akrân Muhzır Kasım Ağa, el-Hâc Ali Çavuş b. Ali, Eyyûblu Receb Çavuş b. Mustafa, Küçükpazarlı Osman Çavuş b. Ahmed, Abdi Ağa b. Ahmed, Mustafa Çavuş b. Derviş, kapıcılar kethüdâsı Ahmed Ağa, Mustafa Çavuş b. Ahmed el-Mübâşir ve gayruhüm.