İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 539 Hüküm no: 587 Orijinal metin no: [165a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Şerife Rahime bt. Ferhad’ın Sâliha Hâtun Vakfı’na borcu olduğu Mahmiye-i İstanbul’da merhûme Sâliha Hâtun vakfına bi’l-fi‘l mütevellî olan bâ‘is-i hâze’l-kitâb hâfız Mehmed Efendi b. Habib nâm kimesne meclis-i şer‘-i şerîfde mahmiye-i mezbûrede Timurtaş mahallesi sâkinelerinden Şerife Rahime bt. Ferhad nâm hâtun mahzarında üzerine da‘vâ ve takrîr-i kelâm edip mezbûre Şerife Rahime’ye bin seksen iki senesi Cumâdelâhiresi gurresinde yedimde olan mâl-ı vakf-ı mezbûrdan dört yüz kırk beş guruşu idâne ve teslîm ve iki Acem keçesini ve bir tülbenti ve on altı zirâ‘ yeşil atlası bi safkatin vâhidetin kırk beş guruşa ve semeni gurre-i şehri mezbûrdan bir sene tamâmına değin müeccel olmak üzre bir yeşil çukaya kaplı zerdeva kürkü dahi yetmiş beş guruşa bey‘ ve teslîm mezbûre Rahime dahi meblağ-ı mezbûru istidâne ve kabz ve zikr olunan keçe [ve] tülbent ve on altı zirâ‘ atlası ve kürkü ber vech-i muharrer iştirâ ve teslîm ettiğinden sonra zimmetinde vakf-ı mezbûra deyni olan cem‘an beş yüz yetmiş beş guruşun üç yüz guruşunu bana edâ ve teslîm ben dahi ahz u kabz edip iki yüz yetmiş beş guruşu bâkī kalıp ve sadrî oğlu olup Nakilcizâde demekle şehîr Süleyman Ağa b. Mehmed nâm kimesne dahi mâl-ı vakf-ı mezbûrdan yedimden istidâne ve kabz eylediği yüz guruşa mezbûre Şerife Rahime tarafeynden emir ve kabûlü hâviye kefâletle kefîl olup ve bin seksen dört senesi evâilinde dahi semeni bir seneye müeccel olmak üzerine mâl-ı vakf-ı mezbûrdan müşterâ dahi bir yeşil çukaya kaplı zerdeva kürkü elli beş guruş üç rub‘a yedimden iştirâ ve kabz ve istihlâk etmekle mezbûre Şerife Rahime üzerine hâlâ dört yüz otuz guruş üç rub‘u asâleten ve kefâleten edâ lâzım olmağla hâlâ mezbûre Şerife Rahime’ye suâl olunup meblağ-ı mezbûru bana edâ ve teslîme tenbîh olunmak matlûbumdur dedikde gıbbe’s-suâl mezbûre Şerife Rahime cevâbında bin seksen iki senesi Cumâdelâhiresi gurresinde müdde‘î-i mezbûr yedinden ancak iki yüz guruş istidâne ve kabz ve zikr olunan keçe ve tülbent ve atlası dahi iki yüz guruşa iştirâ ve tesellüm edip zimmetimde vakf-ı mezbûra deynim olan cem‘an dört yüz guruşdan müdde‘î-i mezbûr [165b] kabzını i‘tirâf eylediği üç yüz guruşdan bâkī yüz guruş deynim bâkī kalmışdır deyip zikr olunan kürkü bin seksen iki senesinde yetmiş beş guruşa ve bin seksen dört senesinde mezbûr Süleyman Ağa’nın istidâne eylediği yüz guruşa kefîl olup ve kürkü dahi elli beş guruş üç rub‘a iştirâ eylediğini inkâr etmeğin müdde‘î-i mezbûrdan müdde‘âsını mübeyyine beyyine taleb olundukda zikr olunan Timurtaş mahallesi imâmı olan Mehmed Efendi b. Mustafa ve Elvanzâde mahallesi sâkinlerinden bogasici el-Hâc Ahmed b. Ali nâm kimesneler li ecli’ş-şehâde meclis-i şer‘a hâzırân olup istişhâd olunduklarında fi’l-hakīka müdde‘î-i mezbûr bin seksen iki senesi Cumâdelâhiresi gurresinde mâl-ı vakf-ı mezbûrdan dört yüz elli beş [guruşu] mezbûre Şerife Rahime’ye bizim huzûrumuzda idâne ve teslîm ve iki Acem keçesini ve bir tülbenti ve on altı zirâ‘ yeşil atlası bi safkatin vâhidetin kırk beş guruşa ve semeni gurre-i şehri mezbûrdan bir sene tamâmına değin müeccel olmak üzre bir yeşil çukaya kaplı zerdeva kürkünü yetmiş beş guruşa bey‘ ve teslîm mezbûre Şerife Rahime dahi iştirâ ve tesellüm etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye edip ve zikr olunan Elvanzâde mahallesi sükkânından Müezzin Ömer Halîfe b. Mehmed ve es-Seyyid İslâm Çelebi b. es-Seyyid Mustafa nâm kimesneler ile bogasici merkūm el-Hâc Ahmed li ecli’ş-şehâde meclis-i şer‘a hâzırûn olup istişhâd olunduklarında fi’l-hakīka mezbûre Şerife Rahime bin seksen dört senesi evâilinde oğlu mezbûr Süleyman Ağa müdde‘î-i mezbûr yedinden istidâne ve kabz eylediği yüz guruşa tarafeynden emir ve kabûlü hâviye kefâletle bizim huzûrumuzda kefîl olup ve bir yeşil çukaya kaplı zerdeva kürkü semeni bir sene tamâmına değin müeccel olmak üzre elli beş guruş üç rub‘a iştirâ ve tesellüm etmiş idi biz bu husûsa bu vech üzre şâhidleriz, şehâdet dahi ederiz deyû her biri edâ-i şehâdet-i şer‘iyye ettiklerinde li ecli’t-ta‘dîl ve’t-tezkiyye şuhûd-ı mezbûrûnun keyfiyyet-i hâllerini suâl için savb-ı şer‘-i şerîfden irsâl olunan Mevlânâ Mustafa Efendi b. Abdülaziz evvelâ zikr olunan Timurtaş mahallesine varıp ahâlîsinden Attâr el-Hâc Mehmed b. İslâm ve Kalaycı Osman Beşe b. Ahmed ve es-Seyyid Ebûbekir Çelebi b. Ali ve Ömer Beşe b. Mustafa ve Hüseyin Beşe b. Derviş ve Mustafa Beşe b. Yusuf nâm kimesnelerden şâhid-i mezbûr Mehmed Efendi’nin keyfiyyet-i hâlini suâl edip ve sâniyen zikr olunan Elvanzâde mahallesine varıp ahâlîsinden İmâm Ahmed Efendi b. Mustafa ve Mehmed Efendi b. Sinan ve Yusuf Efendi b. Hasan ve Odabaşı Ali Beşe b. Abdullah ve el-Hâc Musa b. Abdullah ve el-Hâc Osman b. Ahmed ve Osman Beşe b. Hüseyin ve İsmail Çelebi b. Resûl ve Hasan Beşe b. Mehmed ve Musa b. Mustafa ve Murtaza Ağa b. Abdullah ve Mehmed Çelebi b. Ali ve Mehmed Beşe b. İbrahim nâm kimesnelerden şuhûd-ı mezbûrdan el-Hâc Ahmed b. [166a] Ali ve Ömer Halîfe b. Mehmed ve es-Seyyid İslâm Çelebi’nin keyfiyyet-i hâllerini suâl eyledikde her biri şuhûd-ı mezbûrûn için udûl ve makbûlü’ş-şehâde olduklarını haber verdiklerini Mevlânâ-yı mezbûr mahallinde tahrîr ve ma‘an irsâl olunan Mehmed b. Mehmed ile meclis-i şer‘a gelip alâ vukū‘ihi inhâ ve takrîr etmekle sırren ve alenen ta‘dîl ve tezkiyye olunduklarından sonra şehâdetleri makbûle olmağın mûcebince mezbûr dört yüz guruş üç rub‘u müdde‘î-i merkūm Mehmed Efendi’ye edâ ve teslîme merkūme Şerife Rahime’ye tenbîh olunmağın mâ vaka‘a bi’t-taleb ketb olundu. Fi’l-yevmi’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Kemaleddin Ağa b. ( ) Kethüdâ-yı Hazret-i Efendi, el-Hâc Hüseyin Çelebi b. ( ) tâbi‘-i Hazret-i Efendi, el-Hâc Kasım b. ( ) Sarrâc, el-Hâc Mustafa Kahveci, Mustafa Çelebi b. Durmuş ve gayruhüm.