İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 541 Hüküm no: 588 Orijinal metin no: [166a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa Ağa b. Abdullah’ın evini Hacı Ali Ağa b. Bayezid’a sattığı Mahmiye-i İstanbul’da Nahılbend mahallesi sâkinlerinden fahrü’l-akrân Mustafa Ağa b. Abdullah nâm kimesne tarafından akd-i âti’l-beyânı ikrâra vekîl olduğu Mustafa Bey b. Süleyman ve Hasan Bey b. Sâlih nâm kimesneler şehâdetleri ile şer‘an sâbit olan Abdi Ağa b. Ali nâm kimesne meclis-i şer‘-i şerîfde bâ‘is-i hâze’l-kitâb el-Hâc Ali Ağa b. Bayezid nâm kimesne mahzarında bi’l-vekâle ikrâr ve takrîr-i kelâm edip müvekkilim mezbûr Mustafa Ağa’nın akd-i âti’z-zikrin sudûruna değin yedinde mülk ve hakkı olup mahalle-i mezbûrede vâki‘ bir tarafı Yurdcubaşı Mehmed Ağa mülkü ve bir tarafı Sarı Kethüdâ demekle ma‘rûf merhûm Mustafa Paşa vakfı ve bir tarafı tarîk-i hâs ile mahdûd ve tabaka-i ulyâsında iki bâb oda ve üç sofa ve bir kenîf ve vustâsında üç bâb hizmetkâr odası ve süflîsinde bir ahır ve içinde vâki‘ bir su kuyusu ve bir matbah ve matbaha muttasıl fevkānî bir oda ve bir kenîf ve bir dehliz ve bir kuyu yeri ve havluyu müştemil mülk menzilini, bi cümleti’t-tevâbi‘ ve’l-levâhık ve kâffeti’l-hukūk ve’l-merâfık mezbûr el-Hâc Ali Ağa’ya tarafeynin îcâb ve kabûlü hâvî şurût-ı müfsideden ârî bey‘-i bâtt-ı sahîh-i şer‘î ile altı yüz kıt‘a esedî guruşa bey‘ ve teslîm ol dahi iştirâ ve tesellüm ve kabz eyledikden sonra semeni olan meblağ-ı mezbûr altı yüz esedî guruşu müvekkilim mezbûr Mustafa Ağa’ya edâ ve teslîm ol dahi tamâmen ahz u kabz eyledi ba‘de’l-yevm menzil-i mahdûd-ı mezbûr merkūm el-Hâc Ali Ağa’nın mülk-i müşterâsıdır, keyfe mâ yeşâ’ ve yahtâr mutasarrıf olsun dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’l-hâmis ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Nuh Efendi b. ( ), es-Seyyid Musa Efendi, Ahmed Ağa b. el-Hâc Mehmed Bey, Mustafa Çelebi b. ( ), Osman Bey b. Süleyman Ağa, Nasûh Efendi b. Bayram Bey ve gayruhüm.