İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 542 Hüküm no: 589 Orijinal metin no: [166b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Abdülbâki b. Mehmed’in evini Keçeci Pîrî mahallesi Avârız Vakfı’na bey‘ bi’l-istiğlâl yoluyla sattığı Mahmiye-i İstanbul’da Keçeci Pîrî mahallesinde sâkin Abdülbâkī b. Mehmed nâm kimesne meclis-i şer‘-i şerîfde mahalle-i mezbûre avârızına bi’l-fi‘l mütevellî olan bâ‘is-i hâze’l-kitâb Mehmed Halîfe b. Mustafa nâm kimesne mahzarında ikrâr ve takrîr-i kelâm edip yedimde mülk ve hakkım olup mahalle-i mezbûrede vâki‘ bir tarafdan imâma meşrûta vakıf menzil ve bir tarafdan yorgancı el-Hâc Mustafa mülkü ve bir tarafdan suyolcu el-Hâc Mustafa mülkü ve bir tarafdan tarîk-i hâs ile mahdûd olup büyût-ı adîdeyi müştemil menzilimi, cemî‘ tevâbi‘ ve levâhıkı ile mezbûr Mehmed Halîfe’ye seksen esedî guruşa bi tarîki’l-istiğlâl bey‘ ve teslîm ol dahi ber vech-i muharrer iştirâ ve tesellüm edip semen-i mezbûr seksen esedî guruşu yedinde olan mâl-ı vakf-ı mezbûrdan bana def‘ ve teslîm ben dahi ahz u kabz eylediğimden sonra mezbûr Mehmed Halîfe menzil-i mahdûd-ı mezbûru gıbbe’t-tahliyyeti’ş-şer‘iyye ve’t-tekābuzi’l-mer‘î târih-i kitâbdan iki sene tamâmına değin yirmi dört guruşa bana îcâr ve teslîm ben dahi ber vech-i muharrer istîcâr ve tesellüm ettiğimden sonra sene-i mezbûre tamâmında meblağ-ı mezbûru ve ücret-i mezbûreyi edâ müyesser olmazsa menzil-i mahdûd-ı mezbûru semen-i misli ile âhara bey‘ ve kabz-ı semene ve semeninden meblağ-ı mezbûr seksen guruşu ve ücret-i merkūmeyi istîfâya fazla kalırsa bana îsâle bey‘ ve kabz ve îsâl mütevakkıf olduğu umûrun küllîsine tarafımdan mütevellî-i mezbûr Mehmed Halîfe’yi vekîl ve menâbıma nâib nasb ve ta‘yîn edip ol dahi vekâlet-i mezbûreyi kabûl ve merâsimini edâya müte‘ahhid oldu dedikde gıbbe’t-tasdîki’ş-şer‘î mezbûr Abdülbâkī’nin zevcesi olup zâtı ma‘rifet-i şer‘iyye ile ârifân mahalle-i mezbûre sükkânından kayyım Mustafa Halîfe b. Ömer ve İbrahim Çelebi b. Ali nâm kimesneler ta‘rîfleri ile mu‘arrefe olan Ayşe bt. Ali nâm hâtun semen-i mezbûr seksen guruş ve ücret-i merkūmeye tarafeynden emir ve kabûlü hâvî kefâlet-i sahîha ile kefîl olmağın mâ vaka‘a bi’t-taleb ketb olundu. Fi’l-yevmi’s-sâmin aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mehmed Çelebi b. Ali, İbrahim Çelebi b. Ali, Mustafa Halîfe b. Ömer, el-Hâc Hasan b. Mehmed, Mahmud b. Muslu, Ali b. Mehmed ve gayruhüm.