İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 543 Hüküm no: 590 Orijinal metin no: [166b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ayşe bt. İbrahim’in câriyesi Şehsuvar’ı azat ettiği ve bir miktar eşyasını hibe ettiği Husûs-ı âti’l-beyânın mahallinde tahrîr iltimâs olunmağın savb-ı şer‘den Mevlânâ Mehmed Efendi b. Nasûh irsâl olunup ol dahi Ayşe Hâtun bt. İbrahim’in mahmiye-i İstanbul’da Molla Ahaveyn mahallesinde sâkine olduğu menziline varıp zeyl-i kitâbda muharrerü’l-esâmî olan müslimîn huzûrlarında akd-i meclis-i şerîf eyledikde mezbûre Ayşe meclis-i ma‘kūdda mezbûre kendiye rıkkını i‘tirâf eden orta boylu açık kaşlı gök ala gözlü Macariyyetü’l-asl râfi‘atü hâze’l-kitâb Şehsuvar bt. Abdülvahhab nâm câriye-i memlûkesi mahzarında ikrâr edip mevsûfe-i mezbûreyi hasbeten lillâhi’l-meliki’l-Hallâk ve taleben li merzâti’r-rabbi’r-Rezzâk malımdan tahrîr ve i‘tâk ve zümre-i harâir-i asliyeye idrâc ve ilhâk eylediğimden sonra silk-i mülkümde münselik [167a] eşyâmdan iki minder ve iki döşek ve dört yastık kılıf ve iki yorgan ve bir kaliçe ve bir yan keçesi ve iki kefçe ve bir şamdanı, mevsûfe-i mezbûreye hibe-i sahîha-i şer‘iyye ile hibe ve temlîk ve teslîm eylediğimde, ol dahi meclis-i hibede ittihâb ve temellük ve tesellüm ve kabûl ve kabz eyledi ba‘de’l-yevm mevsûfe-i mezbûre sâir harâir-i asliyyât [gibi] hürre olup üzerinde velâ-i şer‘îden gayrı hakkım kalmadı ve eşyâ-i mezbûre mülk-i mevhûbu olmuşdur, keyfe mâ yeşâ’ ve yahtâr mutasarrıfe olsun dedikde gıbbe’t-tasdîki’ş-şer‘î vâki‘ hâli Mevlânâ-yı mezbûr mahallinde tahrîr ve ma‘an irsâl olunan İsmail Çelebi b. Mahmud ile mahfil-i şer‘a gelip alâ vukū‘ihi inhâ ve takrîr etmeğin mâ hüve’l-vâki‘ bi’t-taleb ketb olundu. Fi’l-yevmi’s-sâbi‘ aşer min şehri Rebî‘ilâhir li sene seb‘a ve semânîn ve elf. Şuhûdü’l-hâl: Mustafa Efendi b. Ali el-Müezzin, Mehmed Çelebi b. Abbas, Veli Çelebi b. Mehmed, Ahmed Efendi b. Ali, Muharrem Beşe b. Hasan, İbrahim Çelebi b. Hasan, İsmail Çelebi b. Mahmud.