İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 544 Hüküm no: 591 Orijinal metin no: [167a-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Ferruh Beşe b. Bayram’ın alacak davasında Mehmed Beşe b. Hüseyin ile sulh olduğu Mahmiye-i İstanbul’da Koca Mustafa Paşa kurbunda Bâzirgân Câmi‘i mahallesinde sâkin Ferruh Beşe b. Bayram nâm kimesne meclis-i şer‘-i şerîfde bâ‘is-i hâze’l-kitâb Mehmed Beşe b. Hüseyin nâm kimesne mahzarında ikrâr ve takrîr-i kelâm edip bundan akdem mezbûr Mehmed Beşe üç esedî guruş kıymetli bir sîm bıçak ve beş guruş kıymetli bir beyaz hâtem ve bir cüzdan ve on guruşumu bi gayri hakkın ahz u kabz ve istihlâk etmekle bundan akdem eşyâ-i mezbûrenin kıymetlerini ve meblağ-ı mezbûru mezbûr Mehmed Beşe’den taleb ve da‘vâ eylediğimde, ol dahi inkâr etmekle beynimizde ba‘de’n-nizâ‘ muslihûn tavassut edip mezbûr Mehmed Beşe ile beynimizde meclis-i sulhde mevcûd bir yeşil dolama ile dokuz buçuk esedî guruşa inşâ-i akd-i sulh ettiklerinde ben dahi sulh-ı mezbûru kabûl ve bedel-i sulh olan mârrü’z-zikr dolamayı [ve] meblağ-ı mezbûr dokuz guruşu mezbûr Mehmed Beşe yedinden ahz u kabz ettiğimden sonra husûs-ı mezbûra müte‘allika da‘vâdan mezbûr Mehmed Beşe’nin zimmetini ibrâ ve iskāt edip mezbûr Mehmed Beşe dahi bedel-i sulh-ı mezbûra müte‘allika da‘vâdan benim zimmetimi ibrâ ve iskāt eyledi dedikde gıbbe’t-tasdîki’ş-şer‘î mâ vaka‘a bi’t-taleb ketb olundu. Fi’l-yevmi’s-sânî ve’l-ışrîn min şehri Rebî‘ilâhir li sene seb‘a ve semânîn ve elf. Şuhûdü’l-hâl: Ahmed Beşe b. Veli el-Mübâşir, Mehmed Beşe b. Mustafa, Abdüllatîf b. Mehmed, Pîrî Beşe b. Süleyman, İbrahim Çelebi b. Süleyman, Süleyman Beşe b. Bayram, Abdi Beşe b. Mehmed ve gayruhüm [mine’l]-hâzırîn.