İstanbul Mahkemesi 18 Numaralı Sicil (H. 1086-1087/M. 1675-1676) cilt: 18, sayfa: 552 Hüküm no: 601 Orijinal metin no: [170b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır. Mustafa b. Mehmed’in Ahmed Ağa Vakfı arsası üzerine bina ettiği menzil masraflarının keşfi Mahrûse-i Galata’ya tâbi‘ kasaba-i Tophâne mahallâtından Kuloğlu mahallesi sâkinlerinden umdetü’l-müderrisînü’l-kirâm zübdetü’l-muhakkikīni’l-fihâm Mustafa Efendi b. Mehmed nâm kimesne meclis-i şer‘-i şâmihü’l-imâd ve mahfil-i dîn-i münîf-i râsihü’l-evtâdda takrîr-i kelâm ve ta‘bîr ani’l-merâm edip ( ) asrında Galata Sarayı [Ağası] olan merhûm Ahmed Ağa -rahimehullahu te‘âlânın-süknâsı ulemâdan saray-ı mezkûrda mu‘allim-i gılmân [171a] olanlardan birine meşrûta vakfı olmağla ber mûceb-i şart-ı vâkıf tevcîh-i hâkimü’ş-şer‘i’ş-şerîf ile tasarrufumda olup berât-ı şerîf-i âlîşân-ı vâcibü’l-iz‘ân-ı şehriyârî ile mütevellîsi olduğum mahalle-i mezbûrede vâki‘ iki tarafdan tarîk-i hâs ve bir tarafdan saray-ı mezbûr ve bir tarafdan tarîk-i âm ile mahdûd tahtânî üç bâb oda ve bir su kuyusu ve cüneyne ve bir kenîf ve bir mikdâr arsa-i hâliyeyi müştemil olan mülk menzilin arsa-i hâliyesi üzerine re’y-i hâkim ile ve malım ile nefsim için mülküm olup menzil-i mahdûd-ı mezkûrun hâriciyyesi olmak üzre tarîk-i âm tarafında fevkānî bir oda ve bir fevkānî biri tahtânî iki kenîf binâ etmişimdir hâliyâ cânib-i şerî‘at-ı garrâdan üzerine varılıp keşf [ve] nazar olunup masrûfum tahmîn-i sahîh ile tahmîn olunmak matlûbumdur deyip husûs-ı mezkûr için bu fakīre hitâben buyruldu-yı şerîf ibrâz etmeğin savb-ı şer‘-i celîl-i lâzımü’t-tebcîlden Mevlânâ Ömer Efendi b. İsmail irsâl olunup ol dahi hâssa mimarlardan üstâd Ali Halîfe b. Abdullah el-Eyyûbî ve diğer üstâd Ali Halîfe b. Abdullah ile üzerine varıp mütevellî-i mûmâ-ileyh mahzarında mimârân-ı mezbûrân keşf ve mesâha ve tahmîn eylediklerinde tûlen on ve arzen dokuz bi hesâb-ı terbî‘î doksan dokuz zirâ‘ sakf ile tûlen otuz iki kadden üç bi hesâb-ı mezbûr doksan altı zirâ‘ tuğla dolma duvar ve bi hesâb-ı mesfûr elli altı zirâ‘ tahta döşemenin zirâ‘ı kırk akçeden on bin kırk akçe tûlen sekiz arzen yedi bi hesâb-ı mezkûr elli altı zirâ‘ tahta tavanın zirâ‘ı otuzar akçeden bin altı yüz seksen akçe ve bir geçme kebîr masandıra bin beş yüz akçe ve sâde kanadlı iki sandık dolap ile bir kemerli oda kapısı yüz ellişer akçeden dört yüz elli akçe ve sâde kanadlı çıkrıkçı işi dört pencere ile taş kürsülü beş İznikmid direkli yüz yirmişer akçeden dokuz ( ) doksan akçe ve beş gülesî? otuzar akçeden yüz elli akçe ve sagīr altı billur pencere ellişer akçeden üç yüz akçe ve iki pâyân dehliz direkleri altmış akçeden yüz yirmi akçe ve üç giren mıhla trabzan kırkar akçeden ve yüz yirmi akçe ve fevkānî bir kenîf bin beş yüz akçe on beş basamaklı bir nerdüban ile bir oda ocağı ve tahtânî bir kenîf beşer yüz akçeden bin beş yüz akçe iki kanadlı bir sokak kapısı üç yüz akçe, cem‘an on sekiz bin altı yüz elli akçe ile ancak olur bundan eksik ile olmak mümkün değildir deyû mimârân-ı mezbûrân ile zeyl-i sütûrda isimleri mastûr olan ebniye ve sukūf ahvâline kem[âl]-i vukūf [ve] şu‘ûr olan bî-garaz udûl-i müslimîn ve sikāt-ı muvahhidîn icmâ‘ [ve] ittifâk ve bu kavl üzerine ittihâd ve vifâk ettiklerinde vâki‘ü’l-hâli Mevlânâ-yı mezbûr mahallinde imlâ ve tahrîr, ba‘dehu ma‘an irsâl olunan Muslu Çelebi b. Hasan ve Hasan Çelebi b. Bayram ile meclis-i şer‘-i hatîre gelip alâ vukū‘ihi inhâ ve takrîr ettiklerinde mâ vaka‘a bi’l-ibtigā ketb olundu. Fî gurreti şehri Rebî‘ilevvel li sene seb‘a ve semânîn ve elf. Şuhûdü’l-hâl: Süleyman Efendi b. Abdullah el-İmâm, İbrahim Efendi [b.] Abdullah el-Müezzin, Abdurrahman Efendi b. el-merhûm Kilisî? Mustafa Efendi, Mehmed Efendi b. Receb, Veli Çelebi b. Ali, Ahmed Çelebi [b.] İbrahim, İbrahim Ağa b. Hızır, Abdülkādir Çelebi [b.] Yusuf, Muslu Beşe [b.] Mustafa ve gayruhüm.